Joriy yilning 17—19-oktabr kunlari Toshkent viloyatining Chirchiq shahri, Sirdaryo va Navoiy viloyatlarida barcha xo‘jalik yurituvchi subyektlar uchun elektron hisobvaraq-fakturalarni majburiy tarzda rasmiylashtirish tartib-qoidalari bo‘yicha o‘quv seminarlari o‘tkazilmoqda. Bu haqda soliq qo‘mitasi matbuot xizmati xabar bermoqda.
Ushbu seminarlar O‘zbekiston Respublikasi Vazirlar Mahkamasining 2018-yil 6-oktabrdagi “Soliq ma’muriyatchiligida zamonaviy axborot-kommunikatsiya texnologiyalarini qo‘llashni kengaytirish chora-tadbirlari to‘g‘risida”gi 807-sonli qarori mazmun-mohiyatini davlat soliq xizmati organlari xodimlariga va soliq to‘lovchilarga yetkazish maqsadida tashkil etilmoqda.
Davlat soliq qo‘mitasi va uning tarkibidagi Malaka oshirish markazi, “Yangi texnologiyalar” ilmiy-axborot markazi, “Soliq-servis” davlat unitar korxonasi mutaxassislari tomonidan bevosita joylarda o‘tkazilayotgan o‘quv seminarlarida xo‘jalik yurituvchi subyektlar vakillariga elektron hisobvaraq-fakturalarni yuritish, ushbu tizimni ishlatish mexanizmlari bo‘yicha tartib-qoidalar ko‘rgazmali vositalar yordamida tushuntirilmoqda.
Ma’lumki, hukumatning yuqoridagi qaroriga asosan 2018-yilning 15-oktabridan Chirchiq shahri, Navoiy va Sirdaryo viloyatlarida elektron hisobvaraq-fakturalarni majburiy tarzda rasmiylashtirishni joriy etish bo‘yicha eksperiment o‘tkazilmoqda.
Eksperiment doirasida elektron hisobvaraq-fakturalar tovar-transport yukxatlari va tovar-moddiy boyliklarni olish uchun ishonchnoma vazifacini bajaradi. Eksperiment natijalari bo‘yicha mazkur mexanizmni butun mamlakat bo‘ylab joriy etish yuzasidan takliflar 2019-yil 1-fevralga qadar kiritilishi belgilangan.
Izoh (0)