AQSh prokuraturasi Sayfullo Soipovga nisbatan o‘lim jazosini qo‘llashni talab qilmoqchi

AQSh prokuraturasi 2017-yilning 31-oktabrida Nyu-Yorkda teraktni amalga oshirgan O‘zbekiston fuqarosi Sayfullo Soipovni o‘lim jazosiga hukm etilishini talab qilmoqchi. Bu haqda NBC News’ga tayanib, “Gazeta.ru” xabar berdi.

Telekanal ma’lumotlariga ko‘ra, Nyu-York shtatida o‘lim jazosi 1953-yildan buyon qo‘llanilmagan.

2017-yilning 31-oktabrida asli o‘zbekistonlik bo‘lgan Sayfullo Soipov Nyu-Yorkning Manxetten qismida o‘zi boshqarib ketayotgan mashinani piyodalar ustiga haydagan edi, hodisa oqibatida sakkiz kishi halok bo‘lgan.

Soipovga 22 banddan iborat ayblov xulosasi chiqarilgandi. U 8 ta qotillik (hujum qurbonlari soni bo‘yicha), 12 ta o‘ldirishga urinish (jabrlanganlar soni), IShIDga ko‘mak, zo‘ravonlik va transport vositasini shikastlashda ayblanmoqda.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.