Ryanair aviakompaniyasi Ispaniyada bort kuzatuvchilari va uchuvchilarning ish tashlashi sababli 28-sentabr kuni 86 ta reysni bekor qildi. Bu esa 16 ming nafar yo‘lovchining rejalari buzilishiga olib kelgan. Bu haqda “RIA Novosti” xabar berdi.
Ish tashlash Ispaniya, Belgiya, Gollandiya, Portugaliya, Italiya va Germaniyada bo‘lib o‘tmoqda. Xabar berilishicha, ish tashlash sababli 28-sentabr kuni amalga oshiriladigan 2400 ta reysadan jami 250 tasi bekor qilingan.
Dastlab 150 ta reys bekor qilinishi rejalashtirilgan, biroq so‘nggi daqiqalarda ish tashlashga germaniyalik uchuvchilar qo‘shilgan va bu yana 100 ta reysning bekor qilinishiga olib kelgan.
Ryanair tomonidan xabar berilishicha, rejalashtirilgan 2400 ta reysdan 90 foizi amalga oshiriladi. Kompaniyaning ma’lum qilishicha, mijozlarni oldindan kutilayotgan ish tashlash haqida ogohlantirgan va ikkita variant taklif qilgan — chiptaning pulini qaytarish yoki uni boshqa kundagi reysga yoki yo‘nalishga almashtirib berish.
Ryanair ish tashlashni keraksiz deb atamoqda va so‘nggi vaqtlarda Irlandiya, Buyuk Britaniya, Italiyadagi kasaba uyushmalari, bort kuzatuvchilari va uchuvchilar bilan muzokaralar sezilarli ilgarilaganini ma’lum qilmoqda. Shuningdek, kompaniya Ispaniya, Belgiya, Gollandiya, Portugaliya, Italiya va Germaniyadagi uchuvchilar va bort kuzatuvchilari bilan maslahatlashuvlar o‘tkazishni taklif qilgan.
Ish tashlovchilar Ryanair rahbariyatidan hamma joyda Irlandiya qonunchiligini qo‘llashni to‘xtatishni, har bir mamlakat uchun mehnat qonunchiligini moslashtirishni talab qilmoqda. Kompaniya ushbu talablarni 2019-yil davomida qondirishga tayyor ekanligini ta’kidlamoqda.
Ryanair Yevropadagi eng yirik aviakompaniya bo‘lib, yiliga 139 million kishini tashiydi, 37 ta mamlakatga 224 ta yo‘nalish bo‘yicha ikki mingtadan ortiq reysni amalga oshiradi. Aviakompaniyada 13 ming kishi ishlaydi.
Izoh (0)