Ryanair авиакомпанияси Испанияда борт кузатувчилари ва учувчиларнинг иш ташлаши сабабли 28 сентябрь куни 86 та рейсни бекор қилди. Бу эса 16 минг нафар йўловчининг режалари бузилишига олиб келган. Бу ҳақда «РИА Новости» хабар берди.
Иш ташлаш Испания, Бельгия, Голландия, Португалия, Италия ва Германияда бўлиб ўтмоқда. Хабар берилишича, иш ташлаш сабабли 28 сентябрь куни амалга ошириладиган 2400 та рейсадан жами 250 таси бекор қилинган.
Дастлаб 150 та рейс бекор қилиниши режалаштирилган, бироқ сўнгги дақиқаларда иш ташлашга германиялик учувчилар қўшилган ва бу яна 100 та рейснинг бекор қилинишига олиб келган.
Ryanair томонидан хабар берилишича, режалаштирилган 2400 та рейсдан 90 фоизи амалга оширилади. Компаниянинг маълум қилишича, мижозларни олдиндан кутилаётган иш ташлаш ҳақида огоҳлантирган ва иккита вариант таклиф қилган — чиптанинг пулини қайтариш ёки уни бошқа кундаги рейсга ёки йўналишга алмаштириб бериш.
Ryanair иш ташлашни кераксиз деб атамоқда ва сўнгги вақтларда Ирландия, Буюк Британия, Италиядаги касаба уюшмалари, борт кузатувчилари ва учувчилар билан музокаралар сезиларли илгарилаганини маълум қилмоқда. Шунингдек, компания Испания, Бельгия, Голландия, Португалия, Италия ва Германиядаги учувчилар ва борт кузатувчилари билан маслаҳатлашувлар ўтказишни таклиф қилган.
Иш ташловчилар Ryanair раҳбариятидан ҳамма жойда Ирландия қонунчилигини қўллашни тўхтатишни, ҳар бир мамлакат учун меҳнат қонунчилигини мослаштиришни талаб қилмоқда. Компания ушбу талабларни 2019 йил давомида қондиришга тайёр эканлигини таъкидламоқда.
Ryanair Европадаги энг йирик авиакомпания бўлиб, йилига 139 миллион кишини ташийди, 37 та мамлакатга 224 та йўналиш бўйича икки мингтадан ортиқ рейсни амалга оширади. Авиакомпанияда 13 минг киши ишлайди.
Изоҳ (0)