Тошкент вилояти Қибрай туманида «Ўзтрансгаз» акциядорлик жамияти томонидан «Соҳада инновацион технологияларни қўллаш – ривожланишнинг муҳим омили« мавзусида брифинг ўтказилди, деб хабар беради ЎзА.
Сир эмас, аҳолини сифатли табиий ва суюлтирилган газ билан таъминлаш, айниқса, куз-қиш мавсумида узлуксиз етказиб бериш, шунингдек, газдан яширинча фойдаланиш, истеъмол қилинган табиий газ ҳақини ўз вақтида тўлаш каби масалаларда муаммолар мавжуд. Мамлакатда давлатнинг халқ билан бевосита мулоқот кўприги ташкил этилгани, хусусан, мурожаатлар билан ишлашда янги тизим йўлга қўйилгани ҳам аҳолининг газ истеъмоли билан боғлиқ муаммолари кўплигини кўрсатди. Шу билан бирга, тизимда фойдаланиб келинаётган эски технологиялар ортиқча газ исрофи ва сарф-харажатни келтириб чиқармоқда. Бир сўз билан айтганда, мавжуд технологиялар маънан эскирган.
– Табиийки, тизимдаги мазкур ҳолат соҳага истиқболли инновацион технологияларни татбиқ этишни тақозо қилмоқда, – дейди «Ўзтрансгаз» АЖ бошқарма бошлиғи Акмал Эшонқулов. – Шу мақсадда юртимиз мутахассислари дунёнинг кўплаб давлатлари тажрибаси ва етакчи фирмалари технологияларини ўрганди. Шу асосда истиқболли, деб топилган 7 лойиҳа амалга оширилмоқда.
Брифингда мутахассислар томонидан журналистларга ушбу лойиҳаларнинг амалга оширилиш жараёни ва аҳамияти тўғрисида батафсил маълумот берилди.
Маълумотларга кўра, газ транспорти тизимида диспетчерлик бошқарув ва маълумотлар йиғимининг автоматлаштирилиши бўйича амалга оширилаётган SCADA дастури мазкур тизимда маълумотларни реал вақтда қабул қилиш, қайта ишлаш, технологик процессларни мантиқий бошқариш, магистрал қувурлардаги авария ҳолатлари бўйича ўз вақтида хабардор бўлиш имконини беради. Яна бир муҳим инновацион лойиҳа бу – компрессор станцияларидаги газ ҳайдаш агрегатлари двигателларидан ажралиб чиқаётган иссиқлик энергиясидан электр энергияси ишлаб чиқариш лойиҳасидир. Мазкур лойиҳа бўйича Италиянинг «TURBODEN« компанияси билан ҳамкорликда Андижон вилоятидаги «Хўжаобод« ер ости газ сақлаш омборида амалий ишлар бошланган. Бунда газ трубинали компрессор станциясида табиий газ ёқилишидан ҳосил бўладиган иссиқлик энергиясидан соатига 1 МВт, йилига 3 миллион кВт соат электр энергияси ишлаб чиқарилади.
Тадбир доирасида туманнинг Усмон Юсупов номли маҳалласига пресс-тур ташкил этилди. ОАВ вакиллари маҳаллада газ тақсимоти тизимини автоматлаштириш лойиҳаси бўйича амалга оширилган ишлар билан танишди.
Қайд этилишича, газ тақсимоти тизимининг автоматлаштирилиши хонадонлардаги табиий газ босими билан боғлиқ муаммоларга тўлиқ барҳам беради. Хусусан, эндиликда аҳолига етказиб берилаётган табиий газ босими 10 баробар оширилади. Мазкур тизимнинг автоматлаштирилиши шунингдек, маҳаллага берилаётган табиий газ босими, ҳарорати тўғрисида марказлашган диспетчерлик хизматига онлайн маълумот узатиш имконини яратиб, ортиқча газ исрофи, ўғрилик, ўз вақтида тўлов, айниқса, газ билан боғлиқ турли бахтсиз ҳодисаларнинг олдини олишга замин яратади.
Тадбир доирасида тизимга оид илғор инновацион технологиялар кўргазмаси ҳам ташкил этилди.
Изоҳ (0)