Qozog‘istonda yonib ketgan avtobus ishi bo‘yicha sud majlisida fojiada omon qolgan haydovchilar so‘roqqa tutildi. Avtobus haydovchilari o‘z aybini tan olmoqda, shu bilan birga, yong‘inda omon qolgan o‘zbekistonliklarni qo‘shimcha so‘roq qilishni talab qilmoqda, deb xabar beradi Sputnik.
Haydovchilardan biri Nurjan Qirg‘izbayev sud va prokurorga avtobus texnik soz bo‘lgani, uning buzilishiga sifatsiz solyarka sabab bo‘lganligi haqida gapirib bergan. Shuningdek, haydovchi avtobus salonida 3 ta o‘t o‘chirgich va oynalarni sindirib, tashqariga chiqish uchun to‘rtta bolg‘a bo‘lganini aytgan.
“Yong‘in boshlanganida haydovchilar nega ulardan foydalanishmadi, bilmayman. Ular shunday qilishlari mumkin edi”, degan sudlanuvchi.
O‘z navbatida, haydovchining sherigi Maksat Pernebekovning ta’kidlashicha, yo‘lovchilardan biri calonda plastik idishga solingan allaqanday suyuq yoqilg‘ini to‘kkan va shundan so‘ng salon yonib ketgan.
Pernebekovning so‘zlariga ko‘ra, yong‘in ro‘y bergan vaqtda avtobus salonida bo‘lmagan va shu bois bo‘lib o‘tgan voqealarni yaxshi eslolmaydi. Chunki faqat kasalxonada o‘ziga kelgan.
“Bizni buksirga olishi uchun bir avtobusni to‘xtatdik, uning 22 yo‘lovchisi bor edi. Ular bizga avtobusdagi yong‘inni o‘chirishga yordam berishmadi! Biz o‘tni o‘zimiz o‘chirardik, avtobusdagilar esa joyidan qimirlamasdi, ularning ko‘z o‘ngida odamlar yonib ketayotganini tomosha qilib o‘tirishardi! Biz o‘sha to‘xtatgan avtobusimizdan o‘to‘chirgichlarni oldik va yo‘lovchilar tashqariga sakrab chiqishlari uchun oynalarni urib sindirdik, biz uch yoki to‘rtta oynani sindirdik, ular nega sakrashmadi, bilmayman”, degan o‘z ko‘rsatmalarida haydovchi.
Haydovchining aytishicha, yonayotgan avtobusdan chiqishga muvaffaq bo‘lgan ikki yo‘lovchi boshqa avtobusda yashiringan va u yoqdan turib yuz berayotgan hodisani tomosha qilgan.
“Yong‘in endi boshlangan vaqtda ular avtobusdan qochib chiqishgan! Ular salondan chiqishmadi, bizga yong‘inni o‘chirishga yordam berishmadi! Ularni taklif qiling, gapirib berishsin, nega bunday qilishganini. Endi hammasida biz aybdor bo‘lib qolayapmiz”, deya o‘z noroziligini bildirgan Pernebekov.
Jabrlanuvchilar Barak Tanatovdan u yong‘in vaqtida nima qilganligi haqida so‘ragan.
“Yong‘in boshlanganda uyquda bo‘lganman, chunki men ikkinchi haydovchi edim. Men ham bu yong‘inda pullarimdan ayrildim. Nijniy Novgorodga o‘zimga mashina sotib olish uchun borayotgandim, pullarim yonib ketdi”, deb aytgan haydovchi.
Shundan so‘ng jabrlanuvchilar avtobus yo‘lovchilari ro‘yxati qayerdaligini so‘rashgan. “Bilmayman”, degan javobni eshitgach esa, baqirib, haydovchini qarg‘ashga tushgan.
“Biz yong‘in ro‘y bergan vaqtda avtobus ichida kimlar bo‘lganini bilmaymiz, ro‘yxat yonib ketgan, balki kimdir yo‘lda tushib, omon qolgandir, agar ro‘yxat bo‘lganida, bu holatga balki oydinlik kiritish mumkin bo‘lardi”, deb aytgan jabrlanuvchilardan biri.
Izoh (0)