O‘zbekistonga kelish istagida bo‘lgan sayyohlar soni 2 barobarga oshdi. Bu haqda Bosh vazir o‘rinbosari Aziz Abduhakimov ma’lum qildi, deya xabar beradi O‘zA.
Litsenziya berish tartibini soddalashtirilgani sababli joriy yilning 8 oyi davomida 183 ta yangi turoperator faoliyat boshladi. 2017-yilda ularning soni 123 tani tashkil etar edi.
E-visa tizimi joriy etilgandan buyon o‘tgan 55 kun mobaynida 46 davlatning 9,5 mingdan ortiq fuqarosiga O‘zbekistonga kirish uchun elektron vizalar berilgan.
Sayyohlik tizimini rivojlantirishga qaratilgan yirik loyihalar ishga tushirildi. Bo‘stonliqdagi “Amirsoy” tog‘-chang‘i kompleksi, trening markazi, golf-klub va golf akademiyasiga ega bo‘lgan Golf Resort majmuasi, Toshkentdagi “Uch shahar” loyihalari shular jumlasidan.
Turizmni rivojlantirish qo‘mitasi vakillarining Germaniya, Fransiya va Misrga amalga oshirgan safarlari davomida mahalliy va xorijiy investorlar ishtirokida qiymati salkam 600 million dollarga teng qo‘shimcha investitsion takliflar ishlab chiqildi.
O‘zbekistonning turistik salohiyati Ispaniya, Turkiya, Germaniya, Rossiya va boshqa davlatlarda o‘tkazilgan ko‘rgazmalarda namoyish etildi. 40 dan ortiq davlatning OAVlarida O‘zbekiston haqida ma’lumotlar e’lon qilinib, 20 davlatning 50 ga yaqin OAV vakillari uchun infoturlar tashkil etilgan. Bunda birgina Xitoyning CCTV-7 telekanali tomonidan namoyish etilgan lavhani 150 millionga yaqin kishi ko‘rgan.
8 oy mobaynida O‘zbekistonga 3,4 million sayyoh kelgan, bu raqam 2017-yilda 1,5 million kishini (+226 foiz) tashkil etgan edi. Joriy yil oxiriga qadar sayyohlar soni 4, 8 millionga yetishi kutilmoqda. Turistik xizmatlar eksportidan tushum esa 666,9 million dollarga yetgan bo‘lib, bu raqam 2017-yildagiga (327,3 million dollar) qaraganda ikki barobardan ham ko‘proqqa ortgan.
Izoh (0)