O‘zbekistonning Ravon avtomobil brendi Rossiyada 2018-yil avgust oyida birorta ham avtomobil sota olmadi. Bu haqda Yevropa biznesi Assotsiatsiyasi avtomobil ishlab chiqaruvchilari qo‘mitasining yangi hisobotida qayd qilindi, deb yozadi “Xalq so‘zi”.
Hisobotda qayd qilinishicha, eng ko‘p sotilgan yangi yengil avtomashinalar asosan mahalliy ishlab chiqaruvchilar mahsulotlariga to‘g‘ri keladi. Shu bilan birga, 2018-yil avgust oyida avtomobillar savdosining 11,0 foizga o‘sishi kuzatilgan. 2017-yilning shu davriga taqqoslanganda, 14 644 dona avtomobil ko‘proq sotilgan, jami 147 388 tani tashkil etgan. Umuman, 2018-yilning yanvar—iyun oylarida Rossiya bozorida jami 1 140 061 dona avtomobil sotilgan.
Biroq O‘zbekistonning Ravon brendi Rossiya avtobozorida o‘z o‘rnini yo‘qotishda davom etmoqda. Korxona ketma-ket uchinchi oydirki umuman avtomobil sota olmay kelmoqda. O‘tgan yilning shu oyida kompaniya Rossiyada 1 518 dona avtomobil sotishga muvaffaq bo‘lgan va bu borada Rossiya bozorida kuchli yigirmatalikka kira olgandi, 2018-yilning ilk 5 oyi mobaynida jami 5 184 ta Ravon brendidagi mashina sotilgan.
Taqqoslash uchun, iyun oyida Rossiya bozorlarida Lada 28 683, KIA 18 857, Hyundai 13 993 dona avtomobilini sotishga muvaffaq bo‘lgan.
Eslatib o‘tamiz, Ravon iyun va iyul oyida ham Rossiya bozorida birorta avtomobil sota olmagandi. Shunga qaramay, kompaniya iyul oyi oxirida Rossiya bozori uchun chiqarilgan avtomobillari narxini keskin oshirgan edi.
Izoh (0)