O‘zbekistonda o‘qituvchi va shifokorlar, hatto hamshiralar ham vaqti-vaqti bilan sinovlardan o‘tib, malakalarini oshirib boradi. Hokim, hokim o‘rinbosarlari, Vazirlar mahkamasi xodimlari, umuman, davlat boshqaruvidagi rahbar xodimlari ham shunday imtihon testlarini topshirib turadimi? Shu savol bilan O‘zA muxbiri Prezident huzuridagi davlat boshqaruv akademiyasi boshqaruv kadrlarni tayyorlash va qayta tayyorlash fakulteti dekani Otabek Hasanovga murojaat qildi.
—Shu vaqtgacha rahbar kadrlar hech qanday malakaviy imtihonlardan o‘tmagan, faqatgina obyektivka tizimi ishlagan. Endilikda barcha davlat boshqaruvidagi kadrlarni malakasini oshirish niyatidamiz. Shu bilan birga, ular haqidagi ma’lumotlarni internet portaliga joylab boramiz.
Ular barcha uchun ochiq bo‘ladi. Portal shunday bo‘ladiki, xohlagan rahbar o‘zini ko‘rsata oladi.
Tasavvur qiling, Qashqadaryo viloyat hokimligida ishlayotgan kadrning xorijiy til bilishi va siyosiy bilimini aniqlash uchun onlayn test olamiz va uning natijalari ham portalga joylanadi.
Biz bu orqali qayerda qanday kadrlar borligini aniqlay olamiz. Shuningdek, kadrlarni lavozimlarga tayinlashda inson omili kamayadi va lavozimlar o‘sishida obyektivlik ta’minlanadi. Kelajakda barcha davlat xizmatchilarining yagona portali bo‘ladi. Ushbu portalda masofaviy tarzda malaka oshirish imkoniyati ham yaratilishi ko‘zda tutilgan.
Har 6 oyda rahbar kadrlar uchun masofaviy darslar, vebinarlar tashkil etib turiladi hamda har 6 oy oralig‘ida rahbar kadrlar bilimi test sinovi orqali tekshirib turiladi. Ya’ni ular doimiy ravishda o‘z ustida ishlashga majbur bo‘ladi.
Izoh (0)