Kecha, 11-sentabr sanasida futbol bo‘yicha Ektor Kuper boshchiligidagi O‘zbekiston terma jamoasi Eron termasiga qarshi o‘rtoqlik o‘yinida maydonga tushib, 0:1 hisobida imkoniyatni boy berdi. Uchrashuvdan so‘ng O‘zbekiston terma jamoasi bosh murabbiyi Ektor Kuper ham matbuot anjumanida qatnashdi.
— Birinchi navbatda ikkita turli xil bo‘limlar guvohiga aylandik. Shuni unutmaslik kerak,raqib oddiy emasdi. Ikkinchi taymda charchoq alomatlari sezildi. Balki bunda mening aybim bordir, mashg‘ulotlar vaqtida jismoniy tayyorgarlikka ko‘proq e’tibor bermagandirmiz. Himoya chizig‘i bugun oldingi bahsga nisbatan yaxshiroq o‘ynadi. Hujumda esa hali qiladigan ishlarimiz ko‘pligi ko‘rinib qoldi. Eron ham ko‘p hujum qildi, demagan bo‘lardim. To‘g‘ri, natija bo‘lmadi, ammo o‘rtoqlik uchrashuvi bo‘lgani uchun ikkinchi bo‘limda yangi futbolchilarni tushirib ularni sinab ko‘rishga qaror qildim. Ikkita o‘yin orqali xulosa qilib aytadigan bo‘lsam, qaysi pozitsiyani kuchaytirishim kerakligini bilib oldim. Keyingi yig‘inga yangi futbolchilar chaqiriladi.— Sizning uslubingiz himoyaviy. Bunday vaziyatda hujumda imkoniyat kam bo‘ladi va o‘sha kam imkoniyatdan foydalanish kerak. Hujum chizig‘ida uch futbolchi Temurxo‘ja Abduholiqov, Igor Sergeyev va Ivan Nagayevni ham sinab ko‘rdingiz. Ular sizning talabingizga javob beradimi yoki yo‘qmi?
— Oldingi matbuot anjumanlarida aytganman. Asosiy urg‘uni himoyaga qaratganman. Hujumchilarning soni bilan hujumkorlikni va uning sifatini bog‘lamagan bo‘lardim. Bugun jamoam 4 nafar hujumkor o‘yinchi harakat qildi. Osiyoning eng kuchli jamoalardan biriga qarshi o‘ynadik. Keyrush 7 yildan buyon ishlamoqda, men esa 14 yoki 15 kundan buyon bu jamoa bilan ishlayapman. Eng asosiysi qayerda xatolar qilganimizni ko‘rib oldim. Qaysi o‘yinchilar mening talablarimga javob bermayotganini aniqlab olaman. Ikkinchi bo‘limda yomon o‘ynadik, bunda mening ham aybim bor.
— Oldinda oktabr va noyabr oyidagi FIFA kunlari bor. Bundan tashqari Superliga tugaganidan so‘ng, taxminan dekabr oyining ikkinchi yarmidan yig‘in o‘tkazish imkoniyati bor. Shu vaqt sizga Osiyo Kubogiga tayyorgarlik uchun yetarli bo‘ladimi? Yoki Superligani ertaroq tugatish borasida taklif bilan chiqasizmi?
— Vaqt yetarli darajada. Xavotir olmang! O‘ylaymanki hech qanday muammo bo‘lmaydi. Indinga men O‘zbekiston chempionati o‘yinlarini kuzatishni boshlayman. Terma jamoani kuchaytirishi mumkin bo‘lgan futbolchilarni kuzataman.
— Yaponiya va Janubiy Koreya terma jamoalarining o‘zagini yosh futbolchilar tashkil qiladi. Bizning terma jamoada yoshi katta futbolchilar ko‘p. Siz yosh futbolchilarga e’tibor qaratasizmi?
— Albatta, to‘g‘ri gapni aytdingiz. O‘zbekiston U23 terma jamoasida ko‘z ostimga olib qo‘ygan futbolchilar bor. Ular terma jamoani kuchaytira olishiga shubham yo‘q. Indoneziyadagi musobaqada ishtirok etishgani uchun ularni sentabr oyidagi yig‘inga chaqirmadik. Oktabr oyidagi yig‘inda hali terma jamoaga umuman chaqirilmagan o‘yinchilar bo‘ladi. Shu o‘rinda jurnalistlarga rahmat aytmoqchiman. Boshqa davlatda bo‘lganida hozirdanoq tanqidiy qarashlar va keskin savollar berishgan bo‘lardi. Sabr uchun barchaga rahmat aytaman.
Izoh (0)