Наманганда кам таъминланган ва ногиронлиги бўлган 90 нафар хотин-қизга имтиёзли кредит асосидаги арзон уй-жойлар калити топширилди. Бу ҳақда «Дарё» мухбири хабар бермоқда.
Шу муносабат билан Тўрақўрғон туманида ташкил этилган тантанали маросимда давлат ва жамоат ташкилотлари вакиллари, меҳнат фахрийлари, ОАВ вакиллари ва ёшлар иштирок этди.
Вилоят ҳокимининг ўринбосари, вилоят хотин-қизлар қўмитаси раиси Иродахон Қўчқоровага кўра, эҳтиёжманд аёллар рўйхати вилоят ишчи гуруҳларининг ўрганишлари, халқ қабулхоналари ва маҳаллий ҳокимликларга тушган мурожаатлар асосида махсус ишчи комиссия томонидан шакллантирилди. Арзон уй-жойлар эса ички имкониятлар эвазига фойдаланишга топширилди.
— Тўрт хўжалик бир хонадонда истиқомат қилишга мажбур эдик. Энди кенг, шинам ҳовлига, барча шароитлари бўлган уйга эга бўлдим. Бу менга чинакам байрам совғаси бўлди, — дейди Янгиқўрғон туманининг Поромон қишлоғи, Оқтепа маҳалласида яшовчи Гулбаҳор Қаҳҳарова.
Тадбирда иштирок этган вилояти ҳокими Хайрулло Бозоров аёлларни янги уйлар ва яқинлашиб келаётган Мустақиллик айёми билан қутлади.
Изоҳ (0)