Joriy yilning 4-iyul kuni xususiy tadbirkor X.X. Namangan viloyati IIB Korrupsiya va iqtisodiy jinoyatlarga qarshi kurashish boʻlimiga murojaat qilib, unda 2013-yildan buyon Chust shahri, Doʻzanda MFYda savdo doʻkoni ochib faoliyat yuritishi, 3-iyul kuni savdo doʻkoniga tuman Davlat soliq idorasi rahbar xodimlari Gʻ.B. va T.N. kelib, savdo doʻkonini soliq xodimlari tekshirmasligi evaziga 300 dollar berishini talab qilganligini maʻlum qilgan. Bu haqda Oʻzbekiston Respublikasi IIV Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasi xabariga tayanib, Ichki ishlar vazirligi matbuot xizmati xabar bermoqda.
Mazkur arizaga asosan, shu kuni Namangan viloyati IIB JQB Korrupsiya va iqtisodiy jinoyatlarga qarshi kurashish boʻlimi hamda Namangan viloyati prokuraturasi xodimlari hamkorlikda oʻtkazilgan tezkor tadbir davomida, Chust tumani Davlat soliq inspeksiyasi boʻlim boshligʻi lavozimida ishlovchi T.N. tuman DSI binosida fuqaro X.X.dan 300 dollarni olgan vaqtida qoʻlga olingan.
Ushbu holat yuzasidan Namangan viloyati prokuraturasi tomonidan JKning 210-moddasi (pora olish) 2-qismi bilan jinoyat ishi qoʻzgʻatilib, T.N. qamoqqa olingan. Shuningdek, uning jinoiy sheriklariga nisbatan ham tergov harakatlari olib borilmoqda.
Izoh (0)