Namangan viloyatining Norin tumani IIB xodimlari tomonidan 2005-yildan beri qidiruvda bo‘lgan, 1977-yilda tug‘ilgan D.M. qo‘lga olindi. Bu haqda “Daryo”ga tuman IIB mutasaddilari ma’lum qildi.
Tafsilotlarga ko‘ra, tumanning Zarbdor mahallasida yashagan D.M. turmush o‘rtog‘i, 1984-yilda tug‘ilgan D.O.ni muttasil haqoratlab, urib-do‘pposlab kelgani sababli ayol 2005-yil may oyida uyida o‘ziga benzin yordamida o‘t qo‘yib, joniga qasd qilgan va halok bo‘lgan. Bu vaqtda oilaning 3 yoshli qizi bor edi.
Ushbu holat bo‘yicha tuman prokuraturasi tomonidan D.M.ga nisbatan Jinoyat kodeksining 103-moddasi, 2-qismi bilan ayblov e’lon qilingan, biroq u noma’lum manzilda yashiringani sababli qidiruvga berilgandi.
D.M. oradan 13 yildan ko‘proq vaqt o‘tib, Toshkent viloyatining Ohangaron tumani, G‘allaquduq mahallasidagi ko‘p qavatli uylarning biridan topildi. U allaqachon boshqa oila qurib, 3 farzandni dunyoga keltirishga ulgurgan ekan.
Hozirda mazkur shaxsga nisbatan tergov harakatlari olib borilmoqda.
Izoh (0)