Ўзбекистон Республикаси ИИВ Ёнғин хавфсизлиги институтида «Тилсиз ёвга қарши биргаликда курашамиз» мавзуида республика илмий-амалий семинари ўтказилди. Бу ҳақда «Ўзтрансгаз» АЖ Ахборот хизмати хабар берди.
Йиғилишда таъкидланишича, жорий йилнинг ўтган олти ойида Ўзбекистонда 5 минг 772 та ёнғинлар содир бўлган. Тан жароҳати олганлар эса икки юз нафар кишидан иборат. Энг ачинарлиси, 74 нафар фуқаро оламдан ўтган. Бугунги кунда ёнғинларнинг 70 фоизи аҳоли яшаш жойларида, хонадонларда содир бўлмоқда.
Амалиётлар шуни кўрсатадики, асосий ҳалокатлар ва тан жароҳатлари носоз ва қўлбола газ қурилмалари, яроқсиз электр мосламалари туфайли ва иситиш ускуналаридан хавфсизлик қоидаларига риоя этмасдан фойдаланиш, спиртли ичимликлар истеъмол қилиб ҳушёрликни йўқотиш оқибатида юзага келган.
Таъкидланишича, ҳамкор ташкилотлар томонидан ҳамжиҳатликда ёнғиннинг олдини олиш, аҳоли хавфсизлигини таъминлаш, газ, электр энергияси, иситиш ускуналаридан фойдаланишда қатъий қоидаларга риоя қилиш бўйича таклифлар кўриб чиқилмоқда.
Давлат ёнғин хавфсизлиги хизмати, Фуқароларнинг ўзини ўзи бошқариш органлари фаолиятини мувофиқлаштириш бўйича Республика Кенгаши бошқаруви ҳамда «Ўзтрансгаз» акциядорлик жамияти ҳамкорлигида аҳоли турар жойларида, маиший хизмат кўрсатиш иншоотларида ёнғин хавфсизлигини таъминлаш, бу борада фуқароларнинг ҳушёрлигини оширишга қаратилган маърифий тарғибот ишлари кучайтиришга алоҳида аҳамият қаратиляпти.
Изоҳ (0)