“Yoshlar” teleradiokanalining “Yangi Davr” dasturi muxbiri Nilufar Raimova Turizmni rivojlantirish davlat qo‘mitasi raisining birinchi o‘rinbosari, ko‘p yillar AQShda faoliyat yuritgan Ulug‘bek Qosimxo‘jayev bilan O‘zbekistonning turizm salohiyati borasida suhbat qildi. Quyida ushbu suhbatni e’tiboringizga havola etamiz.
— Ancha yillik faoliyatingizdan so‘ng O‘zbekistonga qaytdingiz, bunga nima sabab bo‘ldi?
— Avvalambor, shu suhbatga taklif qilganingiz uchun rahmat. O‘zbekistondan ketgan har bir yurtdoshimiz chet elda yashaganda o‘z tug‘ilib o‘sgan yurti, o‘z ona Vatanida nima o‘zgarishlar bo‘lyapti, qanday o‘zgarishlar bo‘ladi, qolaversa, qanday qilib o‘z hissamni o‘sha yerda yashayotgan qarindosh-urug‘, mahalla kuyimga, shahrimga qo‘shsam bo‘ladi.
Bilasizmi, oxirgi bir yarim yil ichida juda katta o‘zgarishlar bo‘ldi. Buni hammamiz qiziqish, intilish bilan qarab turdik. Faqat O‘zbekistonliklar emas, balki judayam mashhur OAVlari The Economist, The New York Times, The Washington Post nashrlari, Xitoy va Hindistondagi nashrlar O‘zbekistonda yuz berayotgan o‘zgarishlarni keng yoritdi. Shulardan kelib chiqqan holda men ham O‘zbekistonga bilim va tajribamni, hissamni qo‘shgim keldi.
— Ushbu lavozimga tayinlanganda qo‘rquv bo‘lmadimi? Uddalay olishingizga ishondingizmi?
— Albatta, qanday ishni yangi boshlaganingizda qo‘rquv bo‘ladi. Qo‘rquvdan ham ko‘ra nima bo‘ladi bilasizmi, agarda bugun men kelib katta o‘zgarishlarni ko‘rib, o‘z hissamni qo‘shmasam ertaga katta pushaymon yeymanmi degan savol tug‘ildi. Qilinayotgan ishlardan ruhlangan holda men ham qo‘rquvni yengib, shu yerga keldim.
— O‘zbekistonning turizm salohiyatini xorijda bilishadimi?
— To‘g‘risi AQShda O‘zbekistonning turizm salohiyati haqida bilishmaydi. Mana hozir katta asos yaratildi turizm sohasida. O‘zbekistonning brendini, tan olinishini piar qilish, marketingni kuchaytiriradigan bo‘lsak hamda turistlarning xohish-istagidan kelib chiqqan holda xizmatlar ko‘rsatadigan bo‘lsak, tezroq sur’atlar bilan O‘zbekistonni dunyoda bilish kuchayadi.
— Ishga kirishgandan so‘ng bilinchi bo‘lib ishni nimadan boshladingiz?
— Birinchi kelganimdan keyin har bir xonaga kirib o‘zimni tanishtirib chiqdim. Men sizlarning jamoangizga qo‘shildim, birgalikda ishlashga tayyorman, sizlarning yordamingiz bilan O‘zbekistonning turizm salohiyatini yanada kuchaytiramiz deb aytdim.
Bilasizmi, bu sohada muammo juda ko‘p. Buni to‘rtta kategoriyaga bo‘lsa bo‘ladi. Birinchi kategoriya hali jahonda O‘zbekistonni yaxshi bilmasligi, ikkinchisi infrastruktura, ya’ni aeroport, samolyotlar, yo‘llardagi ahvol, mehmonxonalardagi holat oddiy sanitariya gigiyena talablariga javob bermaydi. Yana biri bu kadrlar tayyorlash muammosidir.
— Yechimini kutayotgan muammolarni hal etishda takliflaringiz bormi?
— Biz avvalo marketing strategiyamizni kuchaytirishimiz lozim.
— O‘zbekistonning kelajakdagi turistik qiyofasini qanday tasavvur qila olasiz?
— Yaxshi savol berdingiz. Bu borada eng birinchi qiladigan ishim barcha viloyatlardagi holatni birma-bir o‘rganib chiqaman. Qanaqa muammo mavjudu, qanday yutuq va imkoniyat bor, qayerda mehmonxona qursa bo‘ladi, qayerda kurort qursa bo‘ladi, qayerda qandaydir attraksion qursa bo‘ladi. Mana shularni joyida o‘rgangan holda, qaytib kelib, o‘zim ham investor bo‘lganligim sababli investorlarning tilida gaplasha olaman, ularga nima kerak, hammasini yozib chiqishimiz kerak bo‘ladi. Shunchaki chiroyli manzara ko‘rsatib, mana kelsanglar shuncha foyda topasizlar deyish kerak emas. Ularga punktma-punkt a, b, c, d qilib ko‘rsatib berishimiz kerak.
Albatta investorlarni jalb qilishga yuz foiz ishonaman.
Izoh (0)