O‘zbekiston bosh vaziri o‘rinbosari Aziz Abduhakimov mamlakat oliy ta’lim muassasalariga kirish test sinovlarining sakkizinchi kuni — 8 avgustda tashkil etilgan jarayon haqida hisobot berdi. Hisobot matni hukumat a’zosining Facebook’dagi sahifasida berilgan.
Test sinovlarining sakkizinchi kuni O‘zbekistondagi oliy ta’lim muassasalarida test jarayonlari bir vaqtda — 1-smenada 8:00 dan boshlanib, 11:30 ga qadar, 2-smenada 15:00 dan boshlanib, 18:30 ga qadar bo‘lib o‘tdi.
“Shu kunlarda havo haroratining ko‘tarilishi natijasida abituriyentlarning ota-onalari uchun salqin joylarda o‘rinlar soni ko‘paytirildi va u yerda katta hajmli monitorlar yordamida test jarayonlari onlayn ko‘rinishda yoritib borildi”, — deyiladi Abduhakimov qoldirgan xabarda.
Ichki ishlar tizimidan 4 963 ta shaxsiy tarkib xodimlari, 1206 ta aloqa vositalari, 694 ta metallodetektorlar, 289 ta transport vositalari test sinovlari jarayoni xavfsiz o‘tishiga jalb qilindi. Barcha hududlarda jamoat va yong‘in xavfsizligi, test materiallarining maxfiy va dahlsizligi, binolar faoliyat tizimining uzluksiz ishlashi, tibbiy xizmat va inshootlarni qo‘riqlash to‘liq ta’minlandi.
Test sinovlarida 17 ta oliy ta’lim muassasalarining 68 ta ta’lim yo‘nalishida 57 ming 632 nafar abituriyent ishtirok etdi, turli sabablarga ko‘ra 1467 nafar abituriyent test sinovlariga kelmadi. Test sinovlari tartib qoidalarini buzganligi sababli 185 nafar abituriyent — shundan 92 nafari hududga kirish joyida uyali telefon, shpargalkalar olib kirishga va o‘zganing o‘rniga kirishga uringanligi uchun, 93 nafari bino ichida shpargalkadan foydalanishga va boshqa abituriyentlarga yordam berishga uringanligi uchun test sinovlaridan chetlashtirildi.
Test natijalari Qoraqalpog‘iston Respublikasi, viloyatlar va Toshkent shahridan Feldegerlik xizmati tomonidan maxfiyligi va daxlsizligini ta’minlagan holda Davlat test markaziga 18:30 dan qaytarish boshlandi. So‘nggi materiallar Qoraqalpog‘iston Respublikasi va Xorazm viloyatidan kechasi 1:00da yetib keladi. Yetib kelgan test natijalari buyicha darhol kompyuter yordamida qayta ishlash jarayoni boshlanadi.
“Davlat test markazining xodimlari tashqariga chiqmasdan, telefon va boshqa aloqa vositalaridan foydalanmagan hamda test materiallarining maxfiyligini ta’minlagan holda test materiallarini qayta ishlaydi. 8 avgust test natijalari 9 avgust kuni kunning ikkinchi yarmida Davlat test markazining saytida e’lon qilinadi”, — deb yozadi bosh vazir o‘rinbosari Aziz Abduhakimov.
Izoh (0)