Улуғбек Қосимхўжаев: Жаҳон Ўзбекистоннинг туризм салоҳиятидан яхши хабардор эмас (видео)

«Ёшлар» телерадиоканалининг «Янги Давр» дастури мухбири Нилуфар Раимова Туризмни ривожлантириш давлат қўмитаси раисининг биринчи ўринбосари, кўп йиллар АҚШда фаолият юритган Улуғбек Қосимхўжаев билан Ўзбекистоннинг туризм салоҳияти борасида суҳбат қилди. Қуйида ушбу суҳбатни эътиборингизга ҳавола этамиз.

— Анча йиллик фаолиятингиздан сўнг Ўзбекистонга қайтдингиз, бунга нима сабаб бўлди?

— Авваламбор, шу суҳбатга таклиф қилганингиз учун раҳмат. Ўзбекистондан кетган ҳар бир юртдошимиз чет элда яшаганда ўз туғилиб ўсган юрти, ўз она Ватанида нима ўзгаришлар бўляпти, қандай ўзгаришлар бўлади, қолаверса, қандай қилиб ўз ҳиссамни ўша ерда яшаётган қариндош-уруғ, маҳалла куйимга, шаҳримга қўшсам бўлади.

Биласизми, охирги бир ярим йил ичида жуда катта ўзгаришлар бўлди. Буни ҳаммамиз қизиқиш, интилиш билан қараб турдик. Фақат Ўзбекистонликлар эмас, балки жудаям машҳур ОАВлари The Economist, The New York Times, The Washington Post нашрлари, Хитой ва Ҳиндистондаги нашрлар Ўзбекистонда юз бераётган ўзгаришларни кенг ёритди.  Шулардан келиб чиққан ҳолда мен ҳам Ўзбекистонга билим ва тажрибамни, ҳиссамни қўшгим келди.

— Ушбу лавозимга тайинланганда қўрқув бўлмадими? Уддалай олишингизга ишондингизми?

— Албатта, қандай ишни янги бошлаганингизда қўрқув бўлади. Қўрқувдан ҳам кўра нима бўлади биласизми, агарда бугун мен келиб катта ўзгаришларни кўриб, ўз ҳиссамни қўшмасам эртага катта пушаймон ейманми деган савол туғилди.  Қилинаётган ишлардан руҳланган ҳолда мен ҳам қўрқувни енгиб, шу ерга келдим.

— Ўзбекистоннинг туризм салоҳиятини хорижда билишадими?

— Тўғриси АҚШда Ўзбекистоннинг туризм салоҳияти ҳақида билишмайди. Мана ҳозир катта асос яратилди туризм соҳасида. Ўзбекистоннинг брендини, тан олинишини пиар қилиш, маркетингни кучайтирирадиган бўлсак ҳамда туристларнинг хоҳиш-истагидан келиб чиққан ҳолда хизматлар кўрсатадиган бўлсак, тезроқ суръатлар билан Ўзбекистонни дунёда билиш кучаяди.

— Ишга киришгандан сўнг билинчи бўлиб ишни нимадан бошладингиз?        

— Биринчи келганимдан кейин ҳар бир хонага кириб ўзимни таништириб чиқдим. Мен сизларнинг жамоангизга қўшилдим, биргаликда ишлашга тайёрман, сизларнинг ёрдамингиз билан Ўзбекистоннинг туризм салоҳиятини янада кучайтирамиз деб айтдим.

Биласизми, бу соҳада муаммо жуда кўп. Буни тўртта категорияга бўлса бўлади. Биринчи категория ҳали жаҳонда Ўзбекистонни яхши билмаслиги, иккинчиси инфраструктура, яъни аэропорт, самолётлар, йўллардаги аҳвол, меҳмонхоналардаги ҳолат оддий санитария гигиена талабларига жавоб бермайди. Яна бири бу кадрлар тайёрлаш муаммосидир.

— Ечимини кутаётган муаммоларни ҳал этишда таклифларингиз борми?

— Биз аввало маркетинг стратегиямизни кучайтиришимиз лозим.

— Ўзбекистоннинг келажакдаги туристик қиёфасини қандай тасаввур қила оласиз?

— Яхши савол бердингиз. Бу борада энг биринчи қиладиган ишим барча вилоятлардаги ҳолатни бирма-бир ўрганиб чиқаман. Қанақа муаммо мавжуду, қандай ютуқ ва имконият бор, қаерда меҳмонхона қурса бўлади, қаерда курорт қурса бўлади, қаерда қандайдир аттракцион қурса бўлади. Мана шуларни жойида ўрганган ҳолда, қайтиб келиб, ўзим ҳам инвестор бўлганлигим сабабли инвесторларнинг тилида гаплаша оламан, уларга нима керак, ҳаммасини ёзиб чиқишимиз керак бўлади.   Шунчаки чиройли манзара кўрсатиб, мана келсанглар шунча фойда топасизлар дейиш керак эмас. Уларга пунктма-пункт а, б, c, д қилиб кўрсатиб беришимиз керак.

Албатта инвесторларни жалб қилишга юз фоиз ишонаман.