2019 йилнинг 1 январидан Қозоғистонда сиртқи таълим бериш тўхтатилади. Бу ҳақда мамлакат таълим вазири Ерлан Сагадиев «Очиқ мулоқот» порталида фуқаролар билан қилган мулоқоти чоғида маълум қилди, дея хабар беради «Халқ сўзи».
Вазир янги йилдан сиртқи таълим бериш тўхтатилиши, шу билан бирга, бу шаклда таълим олишни давом эттираётган талабалар учун ўз ўқишларини тугатиб олиш имконияти берилишини таъкидлаб ўтган.
Бундан ташқари, олий таълим дастурларини ўзлаштириш учун муддатлар бекор қилиниши режалаштириляпти. Яъни бакалавриатни тезлаштирилган режимда тугаллаш имконини берадиган дастурларни олий ўқув юртларининг ўзлари аниқлайди ва ишлаб чиқади.
ОТМларда пулли асосда таълим олиш учун белгиланган нархларга оид меъёр бекор қилинади. Пулли бўлимларга ўқишга кирган абитуриентлар учун нархларни Қозоғистон университетларининг ўзлари мустақил белгилайди.
Маълумот учун, жорий йил июль ойида Нурсултон Назарбоев республикадаги таълим тизимини танқид қилиб, маҳаллий университетларда кадрлар тайёрлаш сифати пастлиги учун ёшлар Россия олий таълим муассасаларини афзал кўраётганини қайд этиб ўтганди.
Изоҳ (0)