2018-yilning o‘tgan davrida qonunchilik faoliyati doirasida Senat tomonidan o‘tgan yildagidan 1,5 marotaba ko‘proq masalalar ko‘rib chiqildi. Bu haqda 2-avgust kuni Milliy matbuot markazida budjet va iqtisodiy islohotlar masalalari qo‘mitasi tomonidan tashkil etilgan matbuot anjumanida ma’lum qilindi, deb xabar beradi “Daryo” muxbiri Sevara Nishonova.
Budjet va iqtisodiy islohotlar masalalari qo‘mitasi joriy yilning o‘tgan davri mobaynida o‘z sohasiga oid asosiy yo‘nalishlar bo‘yicha ishlarni kuchaytirdi.
Qo‘mitaning birinchi yarim yillikdagi faoliyatiga va ustuvor yo‘nalishlariga bag‘ishlangan matbuot anjumanida hisobot davrida 5 ta majlis o‘tkazilib, ularda qo‘mita vakolatlariga taalluqli 18 ta masala, shu jumladan budjet, moliya sohasi va iqtisodiy islohotlarga doir 3 ta qonun ko‘rib chiqilganligi ta’kidlandi. Jumladan, “Davlat xaridlari to‘g‘risida”gi, “O‘zbekiston Respublikasi Savdo-sanoat palatasi to‘g‘risida”gi (yangi tahriri) qonunlar ko‘rib chiqildi.
Qo‘mitaning nazorat-tahliliy faoliyati qonunlar, davlat dasturlari va boshqa qonun hujjatlari ham mamlakat, ham hududlar miqyosida ijro etilishini o‘rganishga qaratildi. Bir qator nazorat tadbirlari, seminarlar, davra suhbatlari va konferensiyalar o‘tkazildi. Xususan, O‘zbekiston Konstitutsiyasiga muvofiq Senatning mutlaq vakolatlarini bajarish doirasida Markaziy bankning 2017-yildagi faoliyati to‘g‘risidagi hisobot, Hisob palatasining o‘tgan yildagi faoliyati haqidagi hisobot, shuningdek Xususiylashtirilgan korxonalarga ko‘maklashish va raqobatni rivojlantirish davlat qo‘mitasi raisining “Birjalar va birja faoliyati to‘g‘risida”gi qonun hamda fond birjasini rivojlantirish bilan bog‘liq dasturlarni ijro etish holati to‘g‘risidagi hisoboti eshitildi.
Qo‘mita tomonidan hisobot davrida o‘tkazilgan konferensiyalar va seminarlar doirasida valyuta siyosatini erkinlashtirish masalalari, soliq siyosatining zamonaviy yo‘nalishlari, qimmatli qog‘ozlar bozorini rivojlantirish istiqbollari, raqamli iqtisodiyot sharoitida korporativ boshqaruvni rivojlantirishning asosiy tendensiyalari, bank-moliya sektorini innovatsion rivojlantirishning turli jihatlari muhokama etildi, shuningdek qabul qilinayotgan normativ-huquqiy hujjatlarning mazmun-mohiyati va ahamiyati keng tushuntirildi.
Qo‘mita a’zolari tomonidan jismoniy va yuridik shaxslarning 8725 ta murojaati ko‘rib chiqildi. Murojaatlarda ko‘tarilgan masalalarni hal qilish uchun davlat hokimiyati va boshqaruvi organlariga senatorlarning 40 ta murojaati yuborildi. Buning natijasida fuqarolarning yillar davomida yig‘ilib qolgan ko‘plab muammolari hal etildi.
Masalan, Qo‘mitaga Jizzax viloyati Baxmal tumani “Tongotar” mahalla fuqarolar yig‘ini hududidagi Qo‘shtepa va O‘ray qishloqlari aholisidan qariyb 3,5 ming mahalliy aholining suv bilan yetarlicha ta’minlanmagani haqida murojaat kelib tushdi. Ushbu murojaat yuzasidan O‘zbekiston Bosh vazirining birinchi o‘rinbosari Ochilboy Ramatovga Senat a’zosining so‘rovi jo‘natildi. Senator so‘roviga berilgan javobda aholi suv ta’minotini yaxshilash masalasi hududlarni ijtimoiy-iqtisodiy rivojlantirishning bu yilgi manzilli dasturga kiritilgani qayd etildi. Shunday qilib, Qo‘mita tomonidan ko‘tarilgan masala O‘zbekiston Prezidentining “Jizzax viloyati aholisini sifatli ichimlik suvi bilan ta’minlashni yaxshilash chora-tadbirlari to‘g‘risida” 2018-yil 4-maydagi Qarorida o‘z yechimini topdi.
Shu bilan birga, Qo‘mita a’zolari iqtisodiy islohotlarni tatbiq etish, hududlarni ijtimoiy-iqtisodiy rivojlanishtirish, bank-moliya tizimi barqarorligini ta’minlash, tadbirkorlik va xususiy biznesni rivojlantirish sohasida davlatimiz rahbari tomonidan belgilab berilgan vazifalarni bajarish bo‘yicha deputatlik va jamoatchilik nazoratini amalga oshirish yuzasidan ishlar olib bormoqda.
Umuman olganda, Senatda va joylarda 3500 ta qabul amalga oshirildi, shu jumladan Qo‘mitada doimiy asosda ishlovchi senatorlar tomonidan 79 nafar fuqaro qabul qilindi.
Izoh (0)