2018 йилнинг ўтган даврида қонунчилик фаолияти доирасида Сенат томонидан ўтган йилдагидан 1,5 маротаба кўпроқ масалалар кўриб чиқилди. Бу ҳақда 2 август куни Миллий матбуот марказида бюджет ва иқтисодий ислоҳотлар масалалари қўмитаси томонидан ташкил этилган матбуот анжуманида маълум қилинди, деб хабар беради «Дарё» мухбири Севара Нишонова.
Бюджет ва иқтисодий ислоҳотлар масалалари қўмитаси жорий йилнинг ўтган даври мобайнида ўз соҳасига оид асосий йўналишлар бўйича ишларни кучайтирди.
Қўмитанинг биринчи ярим йилликдаги фаолиятига ва устувор йўналишларига бағишланган матбуот анжуманида ҳисобот даврида 5 та мажлис ўтказилиб, уларда қўмита ваколатларига тааллуқли 18 та масала, шу жумладан бюджет, молия соҳаси ва иқтисодий ислоҳотларга доир 3 та қонун кўриб чиқилганлиги таъкидланди. Жумладан, «Давлат харидлари тўғрисида»ги, «Ўзбекистон Республикаси Савдо-саноат палатаси тўғрисида»ги (янги таҳрири) қонунлар кўриб чиқилди.
Қўмитанинг назорат-таҳлилий фаолияти қонунлар, давлат дастурлари ва бошқа қонун ҳужжатлари ҳам мамлакат, ҳам ҳудудлар миқёсида ижро этилишини ўрганишга қаратилди. Бир қатор назорат тадбирлари, семинарлар, давра суҳбатлари ва конференциялар ўтказилди. Хусусан, Ўзбекистон Конституциясига мувофиқ Сенатнинг мутлақ ваколатларини бажариш доирасида Марказий банкнинг 2017 йилдаги фаолияти тўғрисидаги ҳисобот, Ҳисоб палатасининг ўтган йилдаги фаолияти ҳақидаги ҳисобот, шунингдек Хусусийлаштирилган корхоналарга кўмаклашиш ва рақобатни ривожлантириш давлат қўмитаси раисининг «Биржалар ва биржа фаолияти тўғрисида»ги қонун ҳамда фонд биржасини ривожлантириш билан боғлиқ дастурларни ижро этиш ҳолати тўғрисидаги ҳисоботи эшитилди.
Қўмита томонидан ҳисобот даврида ўтказилган конференциялар ва семинарлар доирасида валюта сиёсатини эркинлаштириш масалалари, солиқ сиёсатининг замонавий йўналишлари, қимматли қоғозлар бозорини ривожлантириш истиқболлари, рақамли иқтисодиёт шароитида корпоратив бошқарувни ривожлантиришнинг асосий тенденциялари, банк-молия секторини инновацион ривожлантиришнинг турли жиҳатлари муҳокама этилди, шунингдек қабул қилинаётган норматив-ҳуқуқий ҳужжатларнинг мазмун-моҳияти ва аҳамияти кенг тушунтирилди.
Қўмита аъзолари томонидан жисмоний ва юридик шахсларнинг 8725 та мурожаати кўриб чиқилди. Мурожаатларда кўтарилган масалаларни ҳал қилиш учун давлат ҳокимияти ва бошқаруви органларига сенаторларнинг 40 та мурожаати юборилди. Бунинг натижасида фуқароларнинг йиллар давомида йиғилиб қолган кўплаб муаммолари ҳал этилди.
Масалан, Қўмитага Жиззах вилояти Бахмал тумани «Тонготар» маҳалла фуқаролар йиғини ҳудудидаги Қўштепа ва Ўрай қишлоқлари аҳолисидан қарийб 3,5 минг маҳаллий аҳолининг сув билан етарлича таъминланмагани ҳақида мурожаат келиб тушди. Ушбу мурожаат юзасидан Ўзбекистон Бош вазирининг биринчи ўринбосари Очилбой Раматовга Сенат аъзосининг сўрови жўнатилди. Сенатор сўровига берилган жавобда аҳоли сув таъминотини яхшилаш масаласи ҳудудларни ижтимоий-иқтисодий ривожлантиришнинг бу йилги манзилли дастурга киритилгани қайд этилди. Шундай қилиб, Қўмита томонидан кўтарилган масала Ўзбекистон Президентининг «Жиззах вилояти аҳолисини сифатли ичимлик суви билан таъминлашни яхшилаш чора-тадбирлари тўғрисида» 2018 йил 4 майдаги Қарорида ўз ечимини топди.
Шу билан бирга, Қўмита аъзолари иқтисодий ислоҳотларни татбиқ этиш, ҳудудларни ижтимоий-иқтисодий ривожлаништириш, банк-молия тизими барқарорлигини таъминлаш, тадбиркорлик ва хусусий бизнесни ривожлантириш соҳасида давлатимиз раҳбари томонидан белгилаб берилган вазифаларни бажариш бўйича депутатлик ва жамоатчилик назоратини амалга ошириш юзасидан ишлар олиб бормоқда.
Умуман олганда, Сенатда ва жойларда 3500 та қабул амалга оширилди, шу жумладан Қўмитада доимий асосда ишловчи сенаторлар томонидан 79 нафар фуқаро қабул қилинди.
Изоҳ (0)