Jinoyat ishlari bo‘yicha Samarqand shahar sudining 2018-yil 1-avgustdagi ajrimiga mufoviq, ayblanuvchi, 64-sonli maxsus maktab-internat tungi tarbiyachi yordamchisi lavozimida ishlagan Sherzod Ochilovga nisbatan “qamoqqa olish” tarzidagi ehtiyot chorasi qo‘llanildi, deb xabar beradi “Gazeta.uz”.
Jinoyat ishlari bo‘yicha Samarqand shahar sudi tomonidan O‘zbekiston respublikasi Jinoyat kodeksining 110-moddasi (qiynash) 2-qismi “a” bandida nazarda tutilgan jinoyatni sodir etganlikda ayblanayotgan, 64-sonli alohida sharoitlarda ta’minlash, tarbiyalash va ta’lim berishga muhtoj bolalar uchun ixtisoslashtirilgan maktab-internati tungi tarbiyachi yordamchisi lavozimida ishlagan Sherzod Ochilovga nisbatan Samarqand shahar prokuraturasining “qamoqqa olish” tarzidagi ehtiyot chorasini qo‘llash to‘g‘risidagi iltimosnomasi ko‘rib chiqildi va qanotlantirildi.
Sherzod Ochilov 1994-yilda Samarqand viloyatining Pastdarg‘om tumanida tug‘ilgan, millati o‘zbek, O‘zbekiston Respublikasi fuqarosi, ma’lumoti — oliy, uylanmagan, muqaddam sudlanmagan, Samarqand viloyati Xalq ta’limi boshqarmasiga qarashli 64-sonli maktab-internatida tungi tarbiyachi yordamchisi lavozimida ishlab kelgan.
Ma’lumot uchun 64-sonli alohida sharoitlarda ta’minlash, tarbiyalash va ta’lim berishga muhtoj bolalar uchun ixtisoslashtirilgan maktab-internatida mansabdor va mas’ullar tomonidan tarbiyalanuvchilar tizimli ravishda qiynoqqa solib kelingani holati bo‘yicha avvalroq maktab-internati sobiq direktori Shuhrat Sadinovga nisbatan ham “qamoqqa olish” tarzidagi ehtiyot chorasi qo‘llanilgan edi.
Izoh (0)