O‘zbekistonda “Loyiha boshqaruvi” mutaxassisligi bo‘yicha magistraturada o‘qish tashkil qilinadi

O‘zbekiston Respublikasi Prezidentining “Davlat aktivlarini boshqarish tizimini takomillashtirish chora-tadbirlari to‘g‘risida”gi 2018-yil 12-maydagi PP–3720-son qaroriga asosan joriy yilning sentabr oyidan O‘zbekiston Respublikasi Prezidenti huzuridagi Loyiha boshqaruvi milliy agentligi huzuridagi Korporativ boshqaruv ilmiy-ta’lim markazida bir yilga mo‘ljallangan “Loyiha boshqaruvi” mutaxassisligi bo‘yicha magistratura yo‘nalishi yo‘lga qo‘yilmoqda. Bu haqda markaz matbuot xizmati “Daryo” ga xabar bermoqda.

Xususan, loyiha boshqaruvi – belgilagan natijalarga va maqsadlarga erishish uchun vaqtinchalik bo‘lgan vaqt va resuraslar cheklovlari sharoitida keng ko‘lamli vazifalarni boshqarish usuli, shuningdek loyihalarni boshlash, rejalashtirish, amalga oshirish, monitoring va nazorat qilish hamda tugatish bo‘yicha bevosita faoliyat hisoblanadi.

Xalqaro tajriba shuni ko‘rsatadiki, loyiha boshqaruvi tizimini joriy qilish loyihalarni bajarish muddatlarini 20—30 foizga, amalga oshirish harajatlarini 15—20 foizga qisqartirishga hamda moliyaviy yo‘qotishlar xavfini 10 martadan ortiq kamayishiga imkon beradi.

Markazda ochilishi rejalashtirilayotgan “Loyiha boshqaruvi” yo‘nalishi bo‘yicha magistratura dasturi kompetentlilik yondashuvi asosida olib boriladi, jumladan bilimlarni nafaqat xorijiy tajriba va keng tarqalgan xalqaro standartlar hamda loyiha boshqaruvi metodologiyalariga (“PMBOK” va ISO 21500) tayangan holda berish, balki ularni amaliyotda qo‘llash bilimlari va salohiyatli loyiha rahbarlarining shaxsiy fazilatlariga e’tibor qaratishni ham ko‘zda tutadi. Masalan, bitiruvchilar loyihalarni boshqarish bo‘yicha to‘liq rejalarni ishlab chiqishlari, xavflarga javob bera olishlari, asoslantirilgan va hisoblab chiqilgan boshqaruv qarorlarini qabul qilishi, loyiha jamosini shakllantirishi va ular bilan hamkorlik qila olishi va boshqalarni amalga oshirishi mumkin.

O‘qish jarayoniga loyiha boshqaruvi sohasida sertifikatlangan murabbiylarni, milliy va xalqaro ekspertlarni jalb qilish rejalashtirilgan.

Mazkur magistratura yo‘nalishi bo‘yicha qo‘shimcha to‘liq ma’lumotlarni Markazning rasmiy veb-sahifasidan olish mumkin.