Ўзбекистон Республикаси Президентининг «Давлат активларини бошқариш тизимини такомиллаштириш чора-тадбирлари тўғрисида»ги 2018 йил 12 майдаги ПП–3720-сон қарорига асосан жорий йилнинг сентябрь ойидан Ўзбекистон Республикаси Президенти ҳузуридаги Лойиҳа бошқаруви миллий агентлиги ҳузуридаги Корпоратив бошқарув илмий-таълим марказида бир йилга мўлжалланган «Лойиҳа бошқаруви» мутахассислиги бўйича магистратура йўналиши йўлга қўйилмоқда. Бу ҳақда марказ матбуот хизмати «Дарё» га хабар бермоқда.
Хусусан, лойиҳа бошқаруви – белгилаган натижаларга ва мақсадларга эришиш учун вақтинчалик бўлган вақт ва ресураслар чекловлари шароитида кенг кўламли вазифаларни бошқариш усули, шунингдек лойиҳаларни бошлаш, режалаштириш, амалга ошириш, мониторинг ва назорат қилиш ҳамда тугатиш бўйича бевосита фаолият ҳисобланади.
Халқаро тажриба шуни кўрсатадики, лойиҳа бошқаруви тизимини жорий қилиш лойиҳаларни бажариш муддатларини 20—30 фоизга, амалга ошириш ҳаражатларини 15—20 фоизга қисқартиришга ҳамда молиявий йўқотишлар хавфини 10 мартадан ортиқ камайишига имкон беради.
Марказда очилиши режалаштирилаётган «Лойиҳа бошқаруви» йўналиши бўйича магистратура дастури компетентлилик ёндашуви асосида олиб борилади, жумладан билимларни нафақат хорижий тажриба ва кенг тарқалган халқаро стандартлар ҳамда лойиҳа бошқаруви методологияларига («PMBOK» ва ISO 21500) таянган ҳолда бериш, балки уларни амалиётда қўллаш билимлари ва салоҳиятли лойиҳа раҳбарларининг шахсий фазилатларига эътибор қаратишни ҳам кўзда тутади. Масалан, битирувчилар лойиҳаларни бошқариш бўйича тўлиқ режаларни ишлаб чиқишлари, хавфларга жавоб бера олишлари, асослантирилган ва ҳисоблаб чиқилган бошқарув қарорларини қабул қилиши, лойиҳа жамосини шакллантириши ва улар билан ҳамкорлик қила олиши ва бошқаларни амалга ошириши мумкин.
Ўқиш жараёнига лойиҳа бошқаруви соҳасида сертификатланган мураббийларни, миллий ва халқаро экспертларни жалб қилиш режалаштирилган.
Мазкур магистратура йўналиши бўйича қўшимча тўлиқ маълумотларни Марказнинг расмий веб-саҳифасидан олиш мумкин.
Изоҳ (0)