Avstraliya federal sudi Meriton developerlik kompaniyasini TripAdvisor saytidagi reytingga ta’sir o‘tkazgani uchun uch million dollar jarimaga tortdi. Shu nom bilan ataluvchi mehmonxonalar tarmog‘ining xodimlari 2014-yilning noyabridan 2015-yilning dekabr oyiga qadar mehmonlar ular haqida yomon fikr qoldirmasligi uchun mehmonlarning ma’lumotlarini o‘zgartirgan. Bu haqda Meduza xabar berdi.
Sudning aniqlashicha, Meriton ma’murlari mehmonlarining fikrlarini yig‘ish uchun foydalaniladigan Review Express tizimini aldagan. Tizimning ish prinsipiga ko‘ra, agar mijoz o‘z elektron pochta manzilini qoldirsa, mehmonxona manzilni TripAdvisor xizmatiga jo‘natishi kerak. Xizmat o‘z navbatida mehmonlarga maktub yuborib, mehmonxonada yashash sharoitlari haqida fikr bildirishni taklif qiladi. Bu, odatda, fikrlar sonini uch baravarga oshiradi.
Meriton rahbariyati ma’murlarni biror narsadan shikoyat qilgan mijozlarning elektron pochta manzillariga “MSA” harflarini qo‘shib yozishga majbur qilgan. Shu sababli TripAdvisor mavjud bo‘lmagan manzillarni olgan, izoh berish haqidagi maktub esa norozi mehmongacha yetib bormagan.
2015-yilning 1-aprelidan 31-dekabrigacha 14,5 mingta manzil shu tariqa “tahrir qilingan”.
Shuningdek, sud tomonidan aniqlanishicha, Meriton xodimlari yirik uzilishlar bo‘lgan vaqtda — issiq suv o‘chgan yoki lift buzilgan kunlarda mehmonxonada yashagan kishilarning manzillarini umuman TripAdvisor’ga jo‘natmagan.
Salbiy fikrlarni o‘zgartirish qonun buzilishi deb tan olingan — sud Meriton ma’muriyatini mijozlarni adashtirishga uringan, deb hisobladi. Jarima bilan birga, kompaniyaga yaqin uch yil ichida TripAdvisor’ga jo‘natiladigan elektron pochta manzillarini filtrlash, saralash va chegaralash taqiqlandi.
Izoh (0)