Австралия федерал суди Meriton девелоперлик компаниясини TripAdvisor сайтидаги рейтингга таъсир ўтказгани учун уч миллион доллар жаримага тортди. Шу ном билан аталувчи меҳмонхоналар тармоғининг ходимлари 2014 йилнинг ноябридан 2015 йилнинг декабрь ойига қадар меҳмонлар улар ҳақида ёмон фикр қолдирмаслиги учун меҳмонларнинг маълумотларини ўзгартирган. Бу ҳақда Meduza хабар берди.
Суднинг аниқлашича, Meriton маъмурлари меҳмонларининг фикрларини йиғиш учун фойдаланиладиган Review Express тизимини алдаган. Тизимнинг иш принципига кўра, агар мижоз ўз электрон почта манзилини қолдирса, меҳмонхона манзилни TripAdvisor хизматига жўнатиши керак. Хизмат ўз навбатида меҳмонларга мактуб юбориб, меҳмонхонада яшаш шароитлари ҳақида фикр билдиришни таклиф қилади. Бу, одатда, фикрлар сонини уч бараварга оширади.
Meriton раҳбарияти маъмурларни бирор нарсадан шикоят қилган мижозларнинг электрон почта манзилларига «МСА» ҳарфларини қўшиб ёзишга мажбур қилган. Шу сабабли TripAdvisor мавжуд бўлмаган манзилларни олган, изоҳ бериш ҳақидаги мактуб эса норози меҳмонгача етиб бормаган.
2015 йилнинг 1 апрелидан 31 декабригача 14,5 мингта манзил шу тариқа «таҳрир қилинган».
Шунингдек, суд томонидан аниқланишича, Meriton ходимлари йирик узилишлар бўлган вақтда — иссиқ сув ўчган ёки лифт бузилган кунларда меҳмонхонада яшаган кишиларнинг манзилларини умуман TripAdvisor’га жўнатмаган.
Салбий фикрларни ўзгартириш қонун бузилиши деб тан олинган — суд Meriton маъмуриятини мижозларни адаштиришга уринган, деб ҳисоблади. Жарима билан бирга, компанияга яқин уч йил ичида TripAdvisor’га жўнатиладиган электрон почта манзилларини фильтрлаш, саралаш ва чегаралаш тақиқланди.
Изоҳ (0)