Milliy tiklanish demokratik partiyasi raisi o‘rinbosari Firuza Muhamedjonova o‘z sahifasida 27—29-iyun kunlari Toshkentda bo‘lib o‘tgan pivo festivaliga keskin munosabat bildirdi.
Uning ta’kidlashicha, pivo festivali birinchi marta o‘tayotgani yo‘q. Bu tadbirni o‘tkazish an’anaga aylanib bormoqda. O‘zbek jamiyatida ham spirtli ichimliklar festivallari ochiqchasiga, ommaviy shovqin va reklama bilan o‘tkazilyapti.
“Maydon odamlar bilan gavjum bo‘ldi. Ishtirokchilarning aksariyati yoshlar. rusiyzabon OAVda bu mavzu zo‘r yoritildi. O‘zbekzabon OAV, ziyolilar bilan birga jim. Toshkentning narigi tomonida esa Islom sivilizatsiya markazi qad rostlayapti. Pivo festivali birinchi marta o‘tayotgani yo‘q. Bu tadbirni o‘tkazish an’anaga aylanib bormoqda”, deydi u.
Partiya vakilining fikricha, spirtli ichimliklar ommaviy tarzda targ‘ib qilinayotgan bunday festivallarning oqibati haqida o‘ylab ko‘rilishi lozim.
“Ba’zi doiralar bu kabi festivallarni turistlar uchun, shaharni ochiq va zamonaviy ko‘rsatish uchun, deb asoslashadi. Lekin savol tug‘iladi: oqibatini hisob-kitob qilmagan ochiqlik rivojlanishmi yoki o‘zlikdan voz kechishmi?
Hech bir zamonaviy shahar o‘zligini toptab rivojlanmaydi. 1886-yilda Toshkentning yangi shahar tomonida xalqning tub aholisini izdan chiqarish uchun ataylab Piyon bozori mayxonalar ochilganidan xabarimiz bor. Chorizmni tushunsa bo‘ladi. Bugun-chi? Bugun bu tadbirni kim va nimaga qo‘llab-quvvatlamoqda?!
O‘zbekiston Germaniya emaski, har yili shugina tadbirdan 1 milliard yevrodan ortiq daromad olsa. Yoshlarimizga atigi 5 ming so‘m evaziga spirtli ichimlikni taklif etishni esa oqlab bo‘lmaydi”.
Feruza Muhamedjonova Toshkentda bunday tadbirlarning o‘tkazilishi nafaqat poytaxt, balki butun respublika uchun zararga ishlaydigan namuna ekanini ta’kidladi.
“Toshkent — mamlakatning yuragi. Madaniyat, siyosat, turizm, media — hammasi mana shu yerda boshlanadi. Demak, bu yerda o‘tkazilgan har qanday tadbir butun mamlakat uchun namuna bo‘lmog‘i darkor.
Biroq bu ketishda bu kabi tadbirlar Buxoro, Samarqand va hatto Qo‘qongacha yetib borishi hech gapmas. Balki yetib borgandir ham. Pivo festivalini aynan Toshkentda o‘tkazish — bu shunchaki faollar yoki biznes tashabbusi emas, balki xalqning milliy an’analari va o‘zligiga tupurishdir.
Bugun pivo, ertaga vino, keyin spirtli barlar, hech qanday madaniy cheklovsiz tadbirlar — shunday ketma-ketlikda jamiyatni sezdirmasdan o‘zgartirish mumkin. Albatta, kimning nima ichishi — uning shaxsiy tanlovi. Lekin bu tanlov jamoat joyida, butun jamiyat ko‘z o‘ngida targ‘ib etilishiga yo‘l qo‘yib bo‘lmaydi”.
Ta’kidlanishicha, bugun bahs ochilgan masala bu faqat daraxt masalasi emas.
“Erkinlik tushunchasi madaniyatsizlik va hadsizlikka aralashib ketsa, bu jamiyatning o‘zligini yo‘qotishidan darak. Jamoatchilik bu kabi ommaviy targ‘ibotlarga qarshi fikr bildirishi kerak emasmidi?! Axir bugun ma’naviyat va yoshlar masalasida yetarli ishonish qiyin bo‘lgan muammolar bor.
Mutaxassislarning fikricha O‘zbekistonda ayni kunda eng yosh giyohvandning yoshi 12 da. Demak, bugun bahs ochilgan masala bu faqat daraxt masalasi emas. Bu — insonning o‘z hayoti, kelajagiga bog‘liq masala. Agar bir yog‘och uchun jamiyat shunday faol qo‘zg‘alsa, demak, bu jamiyatdan katta umid kutish mumkin. Negaki musulmon odamning qalbiga Qiyomat qoyim bo‘layotganini ko‘rsang ham, qo‘lingda bir daraxt niholi bo‘lsa, uni ekib ulgur, degan o‘git muhrlangan.
Biroq bu borada ham ikki xil standart borga o‘xshaydi: daraxt kesishga isyon, pivo festivaliga sukunat!
Xulosam: Daraxtni qanday himoya qilsak, o‘zligimizga daxldor masalada ham shunday sobit bo‘laylik. Zero daraxtning bo‘shini baribir qurt yeydi. Alisher Qodirovning daraxtning himoyasiga birlashgandek suv, yer, energoresurslar, oziq-ovqat va vaqt, qolaversa, o‘zligimizning isrofiga qarshi ham birlasha olsak edi, degan fikrlariga qo‘shilaman”, deydi partiya vakili.
Izoh (0)