Ўзбекистон — лоукостерлар кириб бориши даражаси бўйича Осиёдаги аутсайдерлардан бири. Бу ҳақда АNNА.АERО компанияси томонидан ўтказилган маркетинг бўйича мини тадқиқотда айтилади, деб ёзади Spot.
2008—2018 йилларни ўз ичига олган тадқиқотда айтилишича, Осиё ушбу даврда лоукостерларнинг кириб бориш даражаси бўйича Европани ортда қолдирган — ўртача ўсиш суръати 19 фоизга тенг. Таққослаш учун, Европада у 9,4 фоизни ташкил этади.
Бу давр ичида лоукостерларнинг бозордаги улуши 10 фоиздан 28 фоизгача ўсди. 2030 йилга келиб эса бу кўрсаткич 50 фоизга етиши мумкин.
Энг йирик лоукостер 71 миллионта ўрин билан IndiGo бўлди, ундан кейин Lion Air (51 миллион) ва AirAsia (37 миллион) жойлашди.
Энг йирик бозор эса Ҳиндистон бўлди — у ерда лоукостерлар бозорнинг 59 фоизини эгаллаб олишга улгурди, кейинги ўринларда Филиппин (55%) ва Малайзия (54%) жойлашди.
Аутсайдерларга келсак, бутун Осиё бўйича учта мамлакатда лоукостерлар йўқ, булар — Бутан, КХДР ва Кокос ороллари.
Ўзбекистондаги вазият бундан сал яхшироқ, бу ерда лоукостерларга бозорнинг 0,1 фоизи тегишли — мамлакатга парвоз қиладиган ягона лоукостер Тошкент ва Бишкек ўртасида ҳафтасига икки марта қатнайдиган Air Manas’дир.
Қирғизистоннинг ўзи лоукостерларнинг кириб бориши бўйича тўққизинчи ўринда — уларга авиабозорнинг 33 фоизи тўғри келади.
Ўзбекистонга яқин ўринларни Қозоғистон ва Туркманистон (2%), Тожикистон (2,3%) ва Мўғулистон (2,5%) эгаллади.
Изоҳ (0)