Vyetnam Sotsialistik Respublikasi delegatsiyasi vakillari 25-iyul kuni Jizzax viloyatining ijtimoiy-iqtisodiy imkoniyatlari, amalga oshirilayotgan yirik loyihalar bilan tanishish maqsadida bir qator korxonalarda bo‘ldi. Bu haqda O‘zA xabar berdi.
Jizzax shahridagi zamonaviy texnologik uskunalar bilan jihozlangan “Jizzax tekstil”, “Silk expert processing”, Zomin tumanidagi “Zomin asl ipak tolasi” mas’uliyati cheklangan jamiyatlaridagi paxta va pillani chuqur qayta ishlash jarayoni, korxonalarning eksport imkoniyati vyetnamlik ishbilarmonlarda katta qiziqish uyg‘otdi.
“Jizzax” erkin iqtisodiy zonasida mehmonlarga xorijiy va mahalliy ishbilarmonlarga yaratilgan imtiyozlar va afzalliklar haqida ma’lumot berildi. Iqtisodiy zonada qulay investitsiyaviy muhit yaratilgani, yirik loyihalarni amalga oshirish imkoniyatlari kengligi ta’kidlandi.
Xorijiy delegatsiya vakillari uchrashuvda berilgan ma’lumotlar, ishbilarmonlar bilan muloqot o‘zaro manfaatli hamkorlikni yo‘lga qo‘yishda muhim ahamiyatga ega ekanini alohida qayd etdi.
Izoh (0)