Chexiya poytaxti Praga shahrida 24—25-iyul kunlari O‘zbekiston va Chexiya tashqi siyosat idoralari yuridik xizmatlarining ikki davlat hamkorligining shartnomaviy-huquqiy asosini kengaytirish imkoniyatlarini muhokama qilish hamda imzolangan ikki tomonlama hujjatlarni inventarizatsiya qilish bo‘yicha maslahatlashuvlari bo‘lib o‘tdi. Bu haqda TIV axborot xizmati xabar berdi.
Chexiya tomonidan maslahatlashuvlarda TIV Xalqaro huquq departamenti direktori o‘rinbosari Milan Beranek boshchiligidagi delegatsiya ishtirok etdi.
Uchrashuv doirasida bo‘lajak qo‘shma tadbirlar chog‘ida imzolashga o‘z vaqtida va tegishlicha tayyorlash maqsadida tomonlar ishlab chiqayotgan shartnomalarning loyihalari ko‘rib chiqildi. Shuningdek, tomonlar hamkorlikning shartnomaviy-huquqiy asosida turuvchi hujjatlarning maqomini belgilash borasida ham kelishib oldi.
Maslahatlashuvlar chog‘ida mazkur Departament direktori Petr Valek bilan ham uchrashuv bo‘lib o‘tdi. Uchrashuvda umumiy xalqaro huquqning normalarini shakllantirish istiqbollari, jumladan xalqaro huquq normalarini ilg‘or rivojlantirish va kodifikatsiya qilish masalalari bilan shug‘ullanuvchi ko‘p tomonlama tuzilma va formatlardagi hamkorlik yuzasidan fikr almashildi.
Izoh (0)