Вьетнам Социалистик Республикаси делегацияси вакиллари 25 июль куни Жиззах вилоятининг ижтимоий-иқтисодий имкониятлари, амалга оширилаётган йирик лойиҳалар билан танишиш мақсадида бир қатор корхоналарда бўлди. Бу ҳақда ЎзА хабар берди.
Жиззах шаҳридаги замонавий технологик ускуналар билан жиҳозланган «Жиззах текстил», Silk Express Processing, Зомин туманидаги «Зомин асл ипак толаси» масъулияти чекланган жамиятларидаги пахта ва пиллани чуқур қайта ишлаш жараёни, корхоналарнинг экспорт имконияти вьетнамлик ишбилармонларда катта қизиқиш уйғотди.
«Жиззах» эркин иқтисодий зонасида меҳмонларга хорижий ва маҳаллий ишбилармонларга яратилган имтиёзлар ва афзалликлар ҳақида маълумот берилди. Иқтисодий зонада қулай инвестициявий муҳит яратилгани, йирик лойиҳаларни амалга ошириш имкониятлари кенглиги таъкидланди.
Хорижий делегация вакиллари учрашувда берилган маълумотлар, ишбилармонлар билан мулоқот ўзаро манфаатли ҳамкорликни йўлга қўйишда муҳим аҳамиятга эга эканини алоҳида қайд этди.
Изоҳ (0)