Toshkent shahar hokimligi 29-iyuldan keng ko‘lamdagi festivallar ketma-ketligini boshlaydi. Yorqin tadbirlar orasida birinchi bo‘lib “Chilla Fest-2018” festivali o‘tkaziladi. Poytaxtning beshta eng yirik istirohat bog‘i ommaviy xalq sayillari markaziga aylanadi. Bu haqda “Daryo”ga tadbir mutasaddilari ma’lum qildi.
“Chilla Fest-2018” turli yoshdagi kishilar e’tiborini qamrab olishga mo‘ljallangan, oilaviy festival dasturidir. Ushbu bayram shahar aholisi uchun dam olish kunini do‘stlik va samimiyat muhitida o‘tkazish, oila rishtalarini mustahkamlash va o‘z shahriga bo‘lgan muhabbatini oshirishga yana bir imkoniyat yaratadi. Musaffo osmon ostida ushbu tadbir Central Park, Green Park, “Lokomotiv”, “Anhor-Lokomotiv” va Abdulla Qodiriy nomidagi istirohat bog‘larida o‘tkaziladi.
Tashkilotchilar amaldagi attraksion va arg‘imchoqlarga qo‘shimcha ravishda axborot-ko‘ngilochar va hunarmandchilik zonalarini tashkil qiladi, qo‘shiq va raqs ansambllarini jalb qiladi. Festival dasturi turli yosh toifalarini o‘z ichiga qamrab olib, oilaviy va do‘stona muhitda maroqli vaqt o‘tkazishga sharoit yaratib beradi.
“Maqsadimiz shahar aholisi bir kunini bo‘lsa ham yumushlarini unutib, o‘zlariga yaqin va aziz bo‘lgan insonlar, oila a’zolari davrasida o‘tkazishlariga erishishdir. Toshkent kundan-kunga obod, go‘zal, qulay va ochiq shaharga aylanmoqda. Ob-havo muhiti va istirohat bog‘larining rivojlangan infratuzilmasi bu turdagi tadbirlarni ochiq havoda o‘tkazishga undaydi. ‘Chilla Fest-2018’ bir vaqtning o‘zida beshta joyda o‘tkazilishi tirbandlikning oldini olish, aholining bemalol dam olishi va o‘zlariga qulay joyni tanlashi imkonini beradi. Umid qilamizki, keyingi yilda O‘zbekistonning boshqa shaharlari ham bu turdagi tadbirlarni o‘z madaniy dasturlariga kiritadi”,—deydi Toshkent shahar hokimi vazifasini bajaruvchi Jahongir Ortiqxo‘jayev.
Toshkent shahar hokimligi homiylik va hamkorlik to‘g‘risidagi takliflarga ochiqligini ma’lum qiladi. Quyidagi mavzularda murojaat qilish mumkin:
“Chilla Fest-2018”da o‘z korxonangiz zonasini joylashtirish;
Festival doirasida oziq-ovqat savdo shaxobchalarini ochish;
Tadbir o‘tkazishda o‘z yordamingizni taklif qilish;
Istirohat bog‘larining yirik sahnalarida chiqishlarni amalga oshirish.
Taklif va mulohazalar Toshkent shahar hokimligining rasmiy hamkori — “Unique Present Media Holding” korxonasi tomonidan qabul qilinadi.
Telefon: +998(71)150-84-84 (ichki 2);
Elektron pochta manzili: info@upc.uz
Izoh (0)