Биринчи ярим йилликда Ўзбекистонда чет эл капитали иштирокидаги 960 дан ортиқ корхона рўйхатдан ўтказилди. Бош вазир ўринбосари, Инвестициялар бўйича давлат қўмитаси раиси Сухроб Холмуродов инвестиция таклифларини муҳокама қилиш ягона майдончасининг биринчи учрашувида шу ҳақда маълум қилди, дея хабар беради «Газета.uz».
Бу ўтган йилнинг шу даврига нисбатан уч баробарга кўп.
Қўмита раҳбари сўзларига қараганда, бу борада Россия, Туркия, Хитой, Қозоғистон, Жанубий Корея вакиллари алоҳида фаоллик кўрсатмоқда. Афғонистон, Ҳиндистон, Германия, Украина ва Озарбайжон инвесторлари қизиқиш билдирмоқда.
Халқаро молия институтлари ва чет эл ҳукумат молия ташкилотлари маблағларини жалб қилиш соҳасида фаоллашув кузатилмоқда.
«Йил бошидан буён 1,5 миллиард долларлик қарз ва кредитларни жалб қилиш тўғрисидаги битимлар имзоланди», — деди бош вазир ўринбосари.
У тўғридан-тўғри хорижий сармояларни жалб қилишда ижобий натижалар қайд этилаётганини маълум қилди — Ўзбекистон ҳудудларида улар иштирокида 280 дан ортиқ лойиҳалар амалга оширилмоқда.
«Ҳар ҳафта муҳокама учун янги соҳани танлаб олаяпмиз, масалан нефть-газ, кимё, тўқимачилик. Бироқ улардан мустақил равишда инвесторларни қизиқтирувчи бошқа масалалар ҳам кўриб чиқилади», — деди қўмита раҳбари.
У барча хоҳловчилар — инвесторлар, дипломатик миссиялар вакиллари, тадбиркор доиралар вакиллари, ОАВ ходимлари, Ўзбекистон ва чет эл фуқароларини муҳокамаларда иштирок этишга таклиф қилди. Майдончада вазирлик ва маҳкамалар, давлат бирлашмалари раҳбарлари, иқтисодиёт соҳаларига жавобгар мутасаддилар улар билан мулоқотга киришади.
Изоҳ (0)