O‘zbekiston banklarida yaqin vaqt ichida MDH davlatlari milliy valyutalarida hisob raqamlari ochish imkoniyati yaratiladi. Bu haqda Moliya vazirligi matbuot xizmati ma’lum qildi.
Bosh vazir o‘rinbosari, moliya vaziri Jamshid Qo‘chqorov Rossiya Davlatlararo banki delegatsiyasi vakillari bilan uchrashuvda shu haqda kelishib oldi.
“O‘zaro hamkorlikni yo‘lga qo‘yish bo‘yicha dastlabki qadam sifatida MDH mamlakatlari milliy valyutalarida o‘zaro korrespondentlik raqamlarini ochish imkoniyati muhokama qilindi”, — deyiladi xabarda.
To‘lovlarni amalga oshirishda Davlatlararo bank to‘lovchining mamlakati milliy valyutasi oluvchining mamlakati milliy valyutasiga konversiya qilinishini ta’minlaydi.
Uchrashuv doirasida raqamli iqtisodiyotni rivojlantirish, moliyaviy texnologiyalarni joriy etish, pul-kredit siyosati, sug‘urta bozoriga oid dolzarb mavzular muhokama qilindi.
Jumladan, mehnat muhojirlarini moliyaviy-itimoiy qo‘llab-quvvatlash maqsadida turli sug‘urta dasturlarini taqdim etish ko‘zda tutilmoqda. Masalan, muhojirlar Rossiyaga kelishi bilan ma’lum summasi bo‘lgan “Mir” kartasi ochilishi, taxminan 150 ming rublli tibbiy sug‘urta berilishi mumkin.
Izoh (0)