Qonunchilik palatasi deputati: Kattaqo‘rg‘on shahri rahbarlari uchun eng oqilona yo‘l — iste’fo berish

Kattaqo‘rg‘onda IIB xodimi ayol kishini tahqirlagani ma’lum bo‘lganidan so‘ng shahar rahbarlari uchun eng oqilona yo‘l iste’fo berishdir. Oliy Majlis Qonunchilik palatasi deputati Qodir Jo‘rayev shunday talab bilan chiqdi.

“Kattaqo‘rg‘on shahridagi mudhish hodisa faqat bir kishining aybi bilan sodir bo‘lmagan. Bunga shahardagi butun boshli tizim aybdor! Shunday vaziyatda shahar IIB boshlig‘i va shahar prokurori hamma aybni o‘z zimmalariga olib, iste’fo bersalar maqsadga muvofiq bo‘lardi”, — deya yozuv qoldirgan deputat Facebook’dagi sahifasida.

Qodir Jo‘rayev bu talabini shunday izohlagan:

“Nima uchun deysizmi?! Shahar ahlining ishonchini oqlamaganliklari uchun; davlatimizning hozirgi siyosati mazmun-mohiyatini xodimlarga tushuntirib berolmaganliklari va ular ustidan nazoratni qo‘ldan boy berganliklari uchun; Prezidentimizning topshiriqlari so‘zsiz bajarilishini ta’minlab bermaganliklari uchun; eng yomoni — millatimiz kelajagi bo‘lmish ayol zotining tahqirlanishiga yo‘l qo‘yib berganliklari uchun!”