3-iyul, seshanba kuni Prezident Shavkat Mirziyoyev “Raqamli iqtisodiyotni rivojlantirish to‘g‘risida” farmon imzoladi, deb yozmoqda Spot.
Farmonga asosan, O‘zbekistonda blokcheyn, kript-aktiv (raqamli aktiv) va mayning (kript valyuta platformalarining ishlashi uchun zaruriy tuzilmalar) texnologiyalari joriy qilinadi. Farmonda aytilishicha, blokcheyn texnologiyasi davlat organlari faoliyatiga tatbiq qilinadi.
Shuningdek, hujjatda raqamli iqtisodiyotni rivojlantirish bo‘yicha quyidagi vazifalar belgilandi:
- Kript aktivlar, jumladan, mayning, smart-kontakt, blokcheynni tadbirkorlik va investitsion faoliyatga tatbiq qilish;
- blokcheyn sohasi mutaxassislarini tayyorlash;
- raqamli iqtisodiyot sohasida hamkorlik qilish uchun xalqaro va xorij tashkilotlari bilan aloqalar o‘rnatish;
- blokcheyn texnologiyalarini joriy qilishning qonuniy asoslarini ishlab chiqish;
- raqamli iqtisodiyotni rivojlantirishga qaratilgan yangi texnologiyalarni joriy qilishda davlat va xususiy sektor hamkorligini yo‘lga qo‘yish.
Shuningdek, kript aktivlardan foydalanish, ularni sotish-sotib olish jarayoni qonuniylashtiriladi. Kript aktivlar yordamida amalga oshirilgan moliyaviy operatsiyalar soliqqa tortilmaydi.
Loyihalarni boshqarish milliy agentligi va Moliya vazirligiga blokcheynni rivojlantirish bo‘yicha 2018—2020-yillarga mo‘ljallangan dastur ishlab chiqish topshirilgan.
2021-yil 1-yanvaridan boshlab blokcheyn quyidagi sohalarga tatbiq qilinadi:
- davlat organlari faoliyati, davlat buyurtmalari, davlat xizmatlari;
- davlat reyestrlari, klassifikatorlari va boshqa ma’lumotlar bazalari;
- ustavida davlat ulushi nazarda tutilgan yirik tijorat tashkilotlarini boshqarish tizimlari;
- to‘lovlar, tijoriy moliyalashtirish hamda kredit bilan bog‘liq kliring (naqdsiz hisob-kitob) operatsiyalari.
Loyihalarni boshqarish milliy agentligi va Moliya vazirligiga 1 oy ichida kript aktivlarni joriy qilish bo‘yicha takliflarni ishlab chiqish va 2019-yil 1-yanvarga qadar “Raqamli iqtisodiyot va blokcheyn-texnologiyalar to‘g‘risida”gi qonun loyihasini taqdim qilish topshirilgan.
Izoh (0)