4-iyul kuni bo‘lib o‘tgan Xalqaro press klubning navbatdagi sessiyasi O‘zbekiston Prezidentining “Fuqarolik holati dalolatnomalarini qayd etish tizimini yanada takomillashtirish chora-tadbirlari to‘g‘risida”gi qarori muhokamasiga bag‘ishlandi.
Sessiyada O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi, Xotin-qizlar qo‘mitasi, Sog‘liqni saqlash vazirligi, Xalq ta’limi vazirligi, “Mahalla” hayriya jamoat fondi vakillari, imom-xatiblar, milliy va xorijiy OAV vakillari ishtirok etdi.
Tadbirda sohaga mas’ul bo‘lgan mutasaddi vazirlik va idoralar rahbarlari, mutaxassislar qarorning mazmun-mohiyati, unda qayd etilgan muammolar, ularni to‘liq bartaraf etish, belgilangan vazifalarni to‘laqonli amalga oshirish, umumiy qilib aytganda, bevosita aholiga ko‘rsatilayotgan davlat xizmatlarini sifati va samaradorligini yaxshilash bo‘yicha bajarilishi lozim bo‘lgan ishlar haqida bahs-munozara yuritib, tegishli taklif va tavsiyalar bildirdi.
Sessiyada qayd etilishicha, O‘zbekiston aholisi so‘nggi 50 yil ichida uch baravarga yoki 22,37 million kishiga ko‘paygan. Mamlakatda tug‘ilish dinamikasi ham yildan yilga oshib bormoqda. 2000-yilda O‘zbekistonda 527 580 nafar chaqaloq dunyoga kelgan bo‘lsa, 2017-yilda bu ko‘rsatkich 722 094 nafarni tashkil etdi. O‘tgan yili mamlakatda 375 192 nafar o‘g‘il, 346 894 nafar qiz bolalar dunyoga kelgan.
Afsuski, O‘zbekistonda yildan yilga nikohdan ajralishlar soni ham ortib bormoqda. 2011-yilda 18 647 tani tashkil qilgan bo‘lsa, 2017-yilda bu ko‘rsatkich 31 930 tani tashkil etgan. Bu esa o‘tgan yili qurilgan har 100 ta nikohdan 11 tasi ajrim bilan yakunlangan, degani. 2017-yilda qayd etilgan ajrimlarning 67,4 foiziga o‘zaro kelishmovchilik, 2,8 foiziga xiyonat va boshqa sabablar, 6 foiziga boshqa oila qurib yashayotganligi, 4,7 foiziga farzandsizlik, 2,9 foiziga et-xotinning uzoq vaqt birga yashamasligi, 3,8 foiziga tomonlardan birining boshqa davlatga chiqib ketganligi sabab bo‘lgan.
Izoh (0)