Toshkent shahar IIBB xodimlari ishdan bo‘sh vaqtlarida imkoniyati cheklangan insonlar va yolg‘iz keksalar uylarida hashar uyushtirib, mahallalar obodligiga o‘z hissalarini qo‘shib kelmoqda. Bu haqda IIBB matbuot xizmati xabar berdi.
Sergeli tumani IIO FMB shaxsiy tarkibi hokimlik vakillari va o‘zini o‘zi boshqarish organlari bilan hamkorlikda Qipchoq ko‘chasida yashovchi 83 yoshli Roza O‘zbekova xonadonining hovlisini tartibga keltirdi. Bektemir tumani huquq posbonlari esa Zokir Bo‘kayev uyi hovlisini obodonlashtirish bilan birga eskirgan va qarovsiz ahvolga kelib qolgan devorini shlakoblokdan tiklab berdi.
Yakkasaroy tumani IIO FMB xodimlari va hududiy bo‘limlari tomonidan Konstitutsiya mahallasida yashovchi fuqarolardan birining uyida hashar o‘tkazildi. Jismonan imkoniyati cheklangan xonadon egasi ko‘pdan beri hovlisining ozoda bo‘lishini istar, biroq bu ishlarni o‘zi mustaqil bajara olmas edi.
“Obod mahalla” dasturi doirasida elektro‘tkazgich tarmoqlari yangilariga almashtirilmoqda, ko‘p qavatli uylarning kirish yo‘laklari ta’mirlanmoqda, bolalar maydonchalari sozlanib, noqonuniy qurilmalar buzib tashlanmoqda.
Bu jarayonda Toshkent shahar IIBB xodimlari ham faol ishtirok etishmoqda. Ko‘p qavatli uylar atrofini ko‘kalamzorlashtirishda yaqindan yordam berib kelinmoqda. Xususan, Yakkasaroy tumani IIO FMB xodimlari Rakatboshi mahallasidagi, Olmazor tumani IIO FMB va 1-son IIB xodimlari Ziyo mahallasidagi obodonlashtirish ishlariga o‘z hissalarini qo‘shdi.
Bektemir tumanida ko‘cha va yo‘laklarni tartibga keltirish maqsadida salmoqli ishlar bajarildi. Jumladan, huquq tartibot organlari tashabbusi bilan 300 metr uzunlikdagi veloyo‘lak qurib foydalanishga topshirildi.
Izoh (0)