“Sarpomdagi narsalarni sotib kun ko‘ryapmiz”. “Bunyodkor” stadioni xodimlari 6 oydan beri maoshsiz ishlayapti

Futbol bo‘yicha O‘zbekiston Superligasi 13-turidan o‘rin olgan “Paxtakor”— “Bunyodkor” uchrashuvidan so‘ng “qaldirg‘ochlar” ustozi Mirjalol Qosimov jamoasining mavsum avvalidan beri mukofot pullarini olmayotganini ta’kidlagan edi.

Ma’lum bo‘lishicha, nafaqat klub, balki jamoaning “Bunyodkor”(endilikda “Milliy stadion”) stadioni atrofida ham muammolar borligi oydinlashdi. Mazkur holat Milliy olimpiya qo‘mitasi prezidenti hamda O‘FA birinchi vitse-prezidenti Umid Ahmadjonov bilan bo‘lgan suhbat davomida ham muhokama etildi.

“Stadionning 250 dan ziyod ishchi xodimlari yarim yildan buyon oylik-maosh olmaydi. Tasavvur qilyapsizmi, ularning ham oilasi bor, bola-chaqasi bor”,— deb ta’kidlagandi Ahmadjonov. Bu orada “Championat.asia” nashri ham stadion xodimlarining 6 oydan beri maosh olmayotgani haqida xabar berdi.

Vaziyatga biroz bo‘lsa-da oydinlik kiritish maqsadida “Daryo” stadion ishchi-xodimlari bilan bog‘landi.

Besh oy bo‘ldi, mana oltinchi oydirki, yanvar oyidan boshlab oylik maosh olganimiz yo‘q. Iyun bo‘lsa ham oylikdan darak yo‘q. Ko‘plab texnik xodimlar (asosan, ayollar, ayrimlari beva) uyidagi gilamlarini sotib tirikchilik qilmoqda. O‘zim turmushga chiqmaganman, sarpomdagi narsalarni sotib kun ko‘ryapmiz, otam yo‘q, onam esa kasal. Uyda boquvchiman, doriga esa pul yo‘q. Prokuraturaga yozdik, Devon (Prezident devoni)ga yozdik, foydasi bo‘lmayapti. Mehnat vazirligiga, Bosh vazir Aripovga ham yozdik, hech kim ko‘rib bermayapti. Hech kim oylik kechikayotganligini sababini aytgani yo‘q. 5 oydan “beri kutinglar, sabr qilinglar”, deyishadi. Bo‘ldi boshqa gap yo‘q. Uyat bo‘lsa ham aytaman, makulatura, “baklajka” yig‘ib yo‘lkira qilyapmiz. Ba’zi ayollarimiz esa “musorka”lardan “baklajka” yig‘ib topshirib yo‘lkira qilyapti. “Bunyodkor” stadionida 70 ga yaqin texnik xodimlar (ayollar, asosan farroshlik bilan shug‘ullanishadi) ishlaydi. “Bunyodkor” stadionida hech kim ofisdagilar ham buxgalterlar ham maosh olgani yo‘q.

“Bunyodkor” stadioni xodimi

O‘tgan yili (2017-yili) noyabr-dekabrdan boshlab maoshlarda uzilish boshlandi. Noyabr-dekabrning oyligini martda plastikka tashlab berishdi. Avval esa maoshimizni 60 foiz plastik kartochkada 40 foizni naqd olar edik. Avval ham uzilishlar bo‘lardi, faqat 1 yoki 1,5 oy. Hech ham bunday bo‘lib ketmagan edi. Oylik berishmasa ham har kuni 08:00 dan 17:00 ga qadar ishlayapmiz. O‘zimiz yo‘lkira qilib kelib ketyapmiz, qarz bo‘lib ketganmiz. Har kuni eshigimizni (komunnal to‘lovlar nazarda tutilmqoqda) taqillatib kelishadi. Oylik olmayapmiz desak, ishonishmayapti. Qanaqasiga “Bunyodkor”dagilar oylik olmaydi deb?! Hammaga beradi-ku, nega sizlarga bermaydi, deb umuman ishonmay qo‘yishdi. Suv-gazni o‘chirib ketishgan. Qarindoshlarnikiga borib cho‘milib kelamiz. Hali ham ro‘zg‘orga qarindoshlar sal yordam qilib turibdi. Qaysi ishxonada yarim yil oylik bermaydi?

“Bunyodkor” stadioni xodimi

Isitish tizimida 3-4 ta odam ishlayapti, agar ular ham ketsa, hamma dastgohlar “o‘ladi”. Hamma uskunalar chet elniki. Germaniya, Avstriyadan kelgan. 6-yildan beri hech qanday ta’mirlashsiz ishlayapti. Mabodo ular ham ketadigan bo‘lsa…

“Bunyodkor” stadioni xodimi

Ta’kidlash joiz, joriy yilning mart oyida Prezident Shavkat Mirziyoyev “Futbolni rivojlantirish chora-tadbirlari to‘g‘risida”gi qarorga imzo chekkan edi.

Qaror 8-bandida shunday o‘rinlar bor:

“Belgilab qo‘yilsinki:

• “Bunyodkor” stadioni bino va inshootlarini ekspluatatsiya qilish direksiyasi” MChJ “Bunyodkor” stadionining ishchi tashkiloti hisoblanadi;
• moliyalashtirish manbalari “Bunyodkor” stadioni bino va inshootlaridan foydalanish bo‘yicha direksiya” MChJ (bundan buyon Direksiya deb yuritiladi), shuningdek, “Bunyodkor” stadionidan foydalanish va saqlash uchun sarflanadigan xarajatlari “O‘zbekneftgaz” AJ va Direksiya, shuningdek, qonun hujjatlarida taqiqlanmagan boshqa manbalar;
• “O‘zbekneftgaz” AJ bir oy muddat ichida “Bunyodkor” stadioni bino va inshootlardan foydalanish bo‘yicha Direksiya” MChJ ta’sis hujjatlariga Direksiya O‘zbekiston futbol assotsiatsiyasi qoshida faoliyat ko‘rsatishini ko‘zda tutgan holda tegishli o‘zgartirishlar kiritilishini ta’minlasin”.

Ko‘rinib turibdiki, Prezident qarorida “Bunyodkor” stadionini mablag‘ bilan ta’minlashi kerak bo‘lgan asosiy tashkilot “O‘zbekneftgaz” AJ ekanligi ko‘rsatilgan. Avvaldan “O‘zbekneftgaz” “Bunyodkor” klubi va stadionining bosh homiysi hisoblanadi. Shunday ekan, stadion ishchilarining yarim yildan beri maosh olmayotgani masalasiga tashkilot e’tibor qaratib, ijobiy hal etsa maqsadga muvofiq bo‘ladi. Zero, ular o‘zlarining 6 oylik halol ishlab topgan maoshlarini olishni istamoqda, xolos. Har holda har qanday davlat sharoitida 6 oy maoshsiz kun kechirishning o‘zi ayanchli holat hisoblanadi.

Shuningdek, bu masalaga O‘zbekiston Kasaba uyushmalar federatsiyasi ham e’tibor berib, ishchilarning huquqlarini himoya qilish borasida amaliy ko‘rsatsa, nur ustiga nur bo‘lardi.