Футбол бўйича Ўзбекистон Суперлигаси 13-туридан ўрин олган «Пахтакор»— «Бунёдкор» учрашувидан сўнг «қалдирғочлар» устози Миржалол Қосимов жамоасининг мавсум аввалидан бери мукофот пулларини олмаётганини таъкидлаган эди.
Маълум бўлишича, нафақат клуб, балки жамоанинг «Бунёдкор»(эндиликда «Миллий стадион») стадиони атрофида ҳам муаммолар борлиги ойдинлашди. Мазкур ҳолат Миллий олимпия қўмитаси президенти ҳамда ЎФА биринчи вице-президенти Умид Аҳмаджонов билан бўлган суҳбат давомида ҳам муҳокама этилди.
«Стадионнинг 250 дан зиёд ишчи ходимлари ярим йилдан буён ойлик-маош олмайди. Тасаввур қиляпсизми, уларнинг ҳам оиласи бор, бола-чақаси бор»,— деб таъкидлаганди Аҳмаджонов. Бу орада «Championat.asia» нашри ҳам стадион ходимларининг 6 ойдан бери маош олмаётгани ҳақида хабар берди.Вазиятга бироз бўлса-да ойдинлик киритиш мақсадида «Дарё» стадион ишчи-ходимлари билан боғланди.
Беш ой бўлди, мана олтинчи ойдирки, январь ойидан бошлаб ойлик маош олганимиз йўқ. Июнь бўлса ҳам ойликдан дарак йўқ. Кўплаб техник ходимлар (асосан, аёллар, айримлари бева) уйидаги гиламларини сотиб тирикчилик қилмоқда. Ўзим турмушга чиқмаганман, сарпомдаги нарсаларни сотиб кун кўряпмиз, отам йўқ, онам эса касал. Уйда боқувчиман, дорига эса пул йўқ. Прокуратурага ёздик, Девон (Президент девони)га ёздик, фойдаси бўлмаяпти. Меҳнат вазирлигига, Бош вазир Ариповга ҳам ёздик, ҳеч ким кўриб бермаяпти. Ҳеч ким ойлик кечикаётганлигини сабабини айтгани йўқ. 5 ойдан «бери кутинглар, сабр қилинглар», дейишади. Бўлди бошқа гап йўқ. Уят бўлса ҳам айтаман, макулатура, «баклажка» йиғиб йўлкира қиляпмиз. Баъзи аёлларимиз эса «мусорка»лардан «баклажка» йиғиб топшириб йўлкира қиляпти. «Бунёдкор» стадионида 70 га яқин техник ходимлар (аёллар, асосан фаррошлик билан шуғулланишади) ишлайди. «Бунёдкор» стадионида ҳеч ким офисдагилар ҳам бухгалтерлар ҳам маош олгани йўқ.«Бунёдкор» стадиони ходими
Ўтган йили (2017 йили) ноябрь декабрдан бошлаб маошларда узилиш бошланди. Ноябрь декабрнинг ойлигини мартда пластикка ташлаб беришди. Аввал эса маошимизни 60 фоиз пластик карточкада 40 фоизни нақд олар эдик. Аввал ҳам узилишлар бўларди, фақат 1 ёки 1,5 ой. Ҳеч ҳам бундай бўлиб кетмаган эди. Ойлик беришмаса ҳам ҳар куни 08:00 дан 17:00 га қадар ишлаяпмиз. Ўзимиз йўлкира қилиб келиб кетяпмиз, қарз бўлиб кетганмиз. Ҳар куни эшигимизни (комуннал тўловлар назарда тутилмқоқда) тақиллатиб келишади. Ойлик олмаяпмиз десак, ишонишмаяпти. Қанақасига «Бунёдкор»дагилар ойлик олмайди деб?! Ҳаммага беради-ку, нега сизларга бермайди, деб умуман ишонмай қўйишди. Сув-газни ўчириб кетишган. Қариндошларникига бориб чўмилиб келамиз. Ҳали ҳам рўзғорга қариндошлар сал ёрдам қилиб турибди. Қайси ишхонада ярим йил ойлик бермайди?«Бунёдкор» стадиони ходими
Иситиш тизимида 3-4 та одам ишлаяпти, агар улар ҳам кетса, ҳамма дастгоҳлар «ўлади». Ҳамма ускуналар чет элники. Германия, Австриядан келган. 6 йилдан бери ҳеч қандай таъмирлашсиз ишлаяпти. Мабодо улар ҳам кетадиган бўлса…Таъкидлаш жоиз, жорий йилнинг март ойида Президент Шавкат Мирзиёев «Футболни ривожлантириш чора-тадбирлари тўғрисида»ги қарорга имзо чеккан эди.«Бунёдкор» стадиони ходими
Қарор 8-бандида шундай ўринлар бор:
«Белгилаб қўйилсинки:
- «Бунёдкор» стадиони бино ва иншоотларини эксплуатация қилиш дирексияси» МЧЖ «Бунёдкор» стадионининг ишчи ташкилоти ҳисобланади;
- молиялаштириш манбалари «Бунёдкор» стадиони бино ва иншоотларидан фойдаланиш бўйича дирекция» МЧЖ (бундан буён Дирекция деб юритилади), шунингдек, «Бунёдкор» стадионидан фойдаланиш ва сақлаш учун сарфланадиган харажатлари «Ўзбекнефтгаз» АЖ ва Дирекция, шунингдек, қонун ҳужжатларида тақиқланмаган бошқа манбалар;
- «Ўзбекнефтгаз» АЖ бир ой муддат ичида «Бунёдкор» стадиони бино ва иншоотлардан фойдаланиш бўйича Дирекция» МЧЖ таъсис ҳужжатларига Дирекция Ўзбекистон футбол ассоциацияси қошида фаолият кўрсатишини кўзда тутган ҳолда тегишли ўзгартиришлар киритилишини таъминласин».
Шунингдек, бу масалага Ўзбекистон Касаба уюшмалар федерацияси ҳам эътибор бериб, ишчиларнинг ҳуқуқларини ҳимоя қилиш борасида амалий кўрсатса, нур устига нур бўларди.
Изоҳ (0)