Farg‘ona viloyatida 30-iyun — Yoshlar kuniga bag‘ishlangan tadbirlar Farg‘ona davlat universitetida bakalavriat ta’lim yo‘nalishlari hamda magistratura mutaxassisliklari bo‘yicha o‘qishni tamomlagan bitiruvchilarga diplom topshirish marosimi bilan boshlandi. Bu haqda “Daryo” muxbiri Azizjon Ermatov xabar beradi.
Joriy o‘quv yilida mazkur universitetni bitirgan 1522 nafar yoshlarga bakalavr diplomi topshirildi. 12 mutaxassislik bo‘yicha 27 nafar talabaga magistrlik darajasi berildi.
Farg‘ona shahrining Alisher Navoiy ko‘chasi bo‘ylab Youth Day xeshtegi ostida yoshlar paradi o‘tkazildi. Unda qurolli kuchlar, ichki ishlar idoralari xodimlari, o‘qituvchilar, shifokorlar va boshqa kasb egalari bo‘lgan 2 mingga yaqin yoshlar ishtirok etdi. Yoshlar paradi davomida harbiy texnikalar namoyish etildi.
“Biz sog‘lom turmush tarafdorimiz” shiori ostida yoshlar o‘rtasida sportning shaxmat, shashka, tennis, futbol, suzish, stol tennisi, voleybol kabi turlari bo‘yicha musobaqalar o‘tkazildi.
“Hokim va yoshlar” uchrashuvida viloyat hokimi Shuhrat G‘aniyev yoshlarni bayram bilan qutlab, ularning o‘qishda, mehnat va jamoat ishlarida erishayotgan yutuqlarini alohida e’tirof etdi. Viloyat hokimi “Mard o‘g‘lon” davlat mukofoti bilan taqdirlangan “Qo‘qon-1912” professional futbol klubi a’zosi Oybek Rustamov va Davlat xavfsizlik xizmatining Davlat chegaralarini himoya qiluvchi qo‘mitasi harbiy qism vzvod komandiri Qobiljon Hoshimovga mukofotlarni tantanali topshirdi. Mukofot sovrindorlarining har biriga eng kam oylik ish haqining 50 baravari miqdorida pul ham ajratiladi.
Tadbir doirasida bir yil davomida turli sohalarda yuqori natijalarga erishgan yoshlar viloyat hokimi tomomidan esdalik sovg‘alar bilan taqdirlandi.
Uchrashuv davomida viloyat hokimi yoshlarni o‘ylantirayotgan muammolarni eshitib, ularni bartaraf etish yuzasidan mutasaddilarga zarur topshiriqlar berdi. Yoshlarning bir qator taklif va tashabbuslari ham qo‘llab-quvvatlanib, ularni amalga oshirish yuzasidan chora-tadbirlar belgilandi.
Yoshlar kuni tadbirlari “Istiqlol” stadionidagi katta bayram konserti bilan yakunlandi.
Izoh (0)