Фарғона вилоятида 30 июнь — Ёшлар кунига бағишланган тадбирлар Фарғона давлат университетида бакалавриат таълим йўналишлари ҳамда магистратура мутахассисликлари бўйича ўқишни тамомлаган битирувчиларга диплом топшириш маросими билан бошланди. Бу ҳақда «Дарё» мухбири Азизжон Эрматов хабар беради.
Жорий ўқув йилида мазкур университетни битирган 1522 нафар ёшларга бакалавр дипломи топширилди. 12 мутахассислик бўйича 27 нафар талабага магистрлик даражаси берилди.
Фарғона шаҳрининг Алишер Навоий кўчаси бўйлаб Youth Day хештеги остида ёшлар паради ўтказилди. Унда қуролли кучлар, ички ишлар идоралари ходимлари, ўқитувчилар, шифокорлар ва бошқа касб эгалари бўлган 2 мингга яқин ёшлар иштирок этди. Ёшлар паради давомида ҳарбий техникалар намойиш этилди.
«Биз соғлом турмуш тарафдоримиз» шиори остида ёшлар ўртасида спортнинг шахмат, шашка, теннис, футбол, сузиш, стол тенниси, волейбол каби турлари бўйича мусобақалар ўтказилди.
«Ҳоким ва ёшлар» учрашувида вилоят ҳокими Шуҳрат Ғаниев ёшларни байрам билан қутлаб, уларнинг ўқишда, меҳнат ва жамоат ишларида эришаётган ютуқларини алоҳида эътироф этди. Вилоят ҳокими «Мард ўғлон» давлат мукофоти билан тақдирланган «Қўқон-1912» профессионал футбол клуби аъзоси Ойбек Рустамов ва Давлат хавфсизлик хизматининг Давлат чегараларини ҳимоя қилувчи қўмитаси ҳарбий қисм взвод командири Қобилжон Ҳошимовга мукофотларни тантанали топширди. Мукофот совриндорларининг ҳар бирига энг кам ойлик иш ҳақининг 50 баравари миқдорида пул ҳам ажратилади.
Тадбир доирасида бир йил давомида турли соҳаларда юқори натижаларга эришган ёшлар вилоят ҳокими томомидан эсдалик совғалар билан тақдирланди.
Учрашув давомида вилоят ҳокими ёшларни ўйлантираётган муаммоларни эшитиб, уларни бартараф этиш юзасидан мутасаддиларга зарур топшириқлар берди. Ёшларнинг бир қатор таклиф ва ташаббуслари ҳам қўллаб-қувватланиб, уларни амалга ошириш юзасидан чора-тадбирлар белгиланди.
Ёшлар куни тадбирлари «Истиқлол» стадионидаги катта байрам концерти билан якунланди.
Изоҳ (0)