Sayohatchilarning juda ko‘pchiligi haqida eshitganmiz. Shahar kezish uchun kimdir piyoda yo‘lga chiqsa, yana kimdir velosipedni ma’qul ko‘radi. Kimdir esa avtomobilda sayohatga otlanadi. Qashqadaryo viloyati, Shahrisabz shahar, Nomaton MFY, O‘rmontepa mahallasida yashovchi ijtimoiy himoyaga muhtoj Qahramon Uzoqov nogironlik aravachasida O‘zbekistonni aylanish maqsadida safarga chiqqan sayyohlardan biri.
20-iyun kuni yo‘lga chiqqan Qahramon Uzoqov o‘n kun ichida Jizzax viloyatiga yetib keldi. “Daryo” muxbiri Farhod Norbo‘tayev Jizzaxdagi Osiyo bozoriga yaqin manzilda Qahramon Uzoqov bilan uchrashdi.
Yo‘lga chiqqanimga o‘n kun bo‘ldi. Bu vaqt oralig‘ida Samarqand shahrini ham ziyorat qildim. Kuniga necha kilometr masofa bosib o‘tayotganimni hisoblaganim yo‘q. Bir marta yo‘ldagi haydovchilardan so‘raganimda 35 kilometr yuribsiz dedi. To‘g‘risi o‘zim ham shuncha kilometr masofani bosib o‘tganimga ishonmayman. Ba’zan tunda yotish uchun belgilangan manzilga yetib olish ilinjida ko‘p yurishga to‘g‘ri keladi. Ayniqsa, Jomboydan G‘allaorolgacha bo‘lgan manzilda ko‘p harakat qildim. Har qanday qiyinchilikni yengsa bo‘larkan. Ko‘z oldimda turgan ulkan Jizzax tog‘larini (dovon) ham zabt etib, Toshkent tomon ildam ketyapman.Sayohatga chiqqan inson yo‘lda har xil voqeyliklarga duch keladi. Qahramon aka ham xuddi shunday voqealiklarni ko‘rib kelmoqda.Qahramon Uzoqov
- Yo‘lda turli xil insonlarga duch keldim. Besh qo‘l barobar emas-ku? Kimdir to‘g‘ri tushunib yordam berdi. Tushunmaydiganlar ham uchradi. To‘g‘risi, yo‘l davomida meni tilanchi-yu, mayparast deganlar ham bo‘ldi. Bilasizku, hayotda odamlar har xil. Men bu sayohatga o‘zimni irodamni sinash uchun chiqdim.
Nogironlik aravachasida o‘zining imkoniyatini sinash maqsadida yo‘lga chiqqan Qahramon Uzoqov Toshkentga borib, shaharni tomosha qilishni niyat qilgan.
- Hozirgi maqsadim poytaxtga borib Toshkent Sitini tomosha qilish. Agar sovuq tushib qolmasa, qolaversa aravacham pand bermasa vodiyga, so‘ng Buxoro va Xorazm tomonlarga ham sayohatga chiqishga harakat qilaman. Eng katta orzuim nogironlik aravachasida bo‘lsa-da Hajga borish. Aravachangiz yaxshi bo‘lsa qo‘rqmasdan yo‘lda ketaverasiz. Xudo ko‘rsatmasinu, yo‘lda aravachangiz buzilib qolsa bu issiq odamni ancha qiynab qo‘yadi.
Qahramon aka bilan suhbatimiz qisqa bo‘ldi. Videoga olmoqchi edim, ko‘nmadi.
“Odamni xijolatga qo‘ymang, videoga olishingiz shartmas. Ko‘rganlar noto‘g‘ri xayolga boradi. Men bu sayohatga kimnidir rahmini keltirish uchun emas, balki jannatmakon yurtimning go‘zal go‘shalarini ko‘rish uchun chiqdim”, — deydi Qahramon aka.
Garchi nogironlik aravachasida bo‘lsa-da sayohatga chiqqan Qahramon Uzoqovning irodasiga qoyil qolmay iloji yo‘q. U kishini ko‘zlagan manziliga eson-omon yetib olishiga, Toshkentga kelib, o‘zining haqiqiy qahramonligini ko‘rsatishiga tilakdoshmiz.
Farhod Norbo‘tayev
Izoh (0)