Samarqand viloyat IIB dronlardan foydalanishni yo‘lga qo‘ydi

Samarqand viloyat IIB jinoyatchilikni oldini olish, sodir etilgan jinoyatlarni izidan ochish va fosh etish, innovatsion texnologiyalarni qo‘llash, ilg‘or tajribalarni amaliyotga joriy etish maqsadida dron texnologiyasidan tajriba tariqasida foydalanishni yo‘lga qo‘ydi. Bu haqda boshqarma matbuot xizmati ma’lum qildi, deya xabar bermoqda O‘zA.

Viloyat Ichki ishlar boshqarmasi dronlardan quyidagi yo‘nalishlarda foydalanmoqda:

Uchuvchisiz boshqariladigan texnologiyadan hodisa sodir bo‘lgan joyga tergov-tezkor guruhidan oldin yetib borishi natijasida, jinoyat davom etayotgan obyektda nechta jinoyatchi borligi, ularning qay holatda va qayerda turganligi, jinoyatchilar tomonidan kimlarni garovda ushlab turganligi, jinoyatchilar qanaqa qurollar bilan qurollanganligi va boshqa shu kabi tergov-tezkor guruhiga zarur ma’lumotlarni tezkorlikda “onlayn” rejimida ko‘rish imkoniyatini yaratish;

Tog‘li va boshqa harakatlanish noqulay hududlarda narkotik vositalar hamda kontrabanda mahsulotlarini olib kirilishini va boshqa shu kabi jinoiy holatlarni aniqlash, zarur ma’lumotlar va dalillarni to‘plash;

“Qoradori” tadbirlarini o‘tkazish chog‘ida iqtisodiy xarajatlarni kamaytirish, vertolyot va boshqa shu kabi, ko‘p sarf-xarajatlar talab qiluvchi qurilmalar o‘rniga qo‘llab, ish samaradorligini va tejamkorligini oshirish;

Ommaviy tadbirlar, jumladan, sayllar, ruxsat etilgan va ruxsat etilmagan turli xil namoyishlarni onlayn kuzatib borish, nazorat qilish hamda bu bo‘yicha tezkor va aniq qarorlar qabul qilish;

Hududlarda sodir bo‘lgan yirik yong‘inlarni o‘chirishda uchuvchisiz moslama yordamida olingan ma’lumotlarga tayanib, yonayotgan obyekt to‘g‘risida to‘liq ma’lumot olish va shu asosida kuch vositalarni to‘g‘ri taqsimlash, yo‘naltirish, o‘t o‘chirish moslamalarini birinchi bo‘lib, qayerda ishlatish;

Huquqbuzarliklar profilaktikasi va huquqiy targ‘ibot ishlarini ta’sirchanligi va samaradorligini oshirish, zamonaviy ko‘rinishda amalga oshirish;

Ichki ishlar organlarining matbuot xizmatlari faoliyatida foydalanishda.

Bundan tashqari, viloyat IIB boshqa yo‘nalishlarda ham uchuvchisiz qurilmaning imkoniyatlarini tekshirib ko‘rmoqda.