Саёҳатчиларнинг жуда кўпчилиги ҳақида эшитганмиз. Шаҳар кезиш учун кимдир пиёда йўлга чиқса, яна кимдир велосипедни маъқул кўради. Кимдир эса автомобилда саёҳатга отланади. Қашқадарё вилояти, Шаҳрисабз шаҳар, Номатон МФЙ, Ўрмонтепа маҳалласида яшовчи ижтимоий ҳимояга муҳтож Қаҳрамон Узоқов ногиронлик аравачасида Ўзбекистонни айланиш мақсадида сафарга чиққан сайёҳлардан бири.
20 июнь куни йўлга чиққан Қаҳрамон Узоқов ўн кун ичида Жиззах вилоятига етиб келди. «Дарё» мухбири Фарҳод Норбўтаев Жиззахдаги Осиё бозорига яқин манзилда Қаҳрамон Узоқов билан учрашди.
Йўлга чиққанимга ўн кун бўлди. Бу вақт оралиғида Самарқанд шаҳрини ҳам зиёрат қилдим. Кунига неча километр масофа босиб ўтаётганимни ҳисоблаганим йўқ. Бир марта йўлдаги ҳайдовчилардан сўраганимда 35 километр юрибсиз деди. Тўғриси ўзим ҳам шунча километр масофани босиб ўтганимга ишонмайман. Баъзан тунда ётиш учун белгиланган манзилга етиб олиш илинжида кўп юришга тўғри келади. Айниқса, Жомбойдан Ғаллаоролгача бўлган манзилда кўп ҳаракат қилдим. Ҳар қандай қийинчиликни енгса бўларкан. Кўз олдимда турган улкан Жиззах тоғларини (довон) ҳам забт этиб, Тошкент томон илдам кетяпман.Саёҳатга чиққан инсон йўлда ҳар хил воқейликларга дуч келади. Қаҳрамон ака ҳам худди шундай воқеаликларни кўриб келмоқда.Қаҳрамон Узоқов
- Йўлда турли хил инсонларга дуч келдим. Беш қўл баробар эмас-ку? Кимдир тўғри тушуниб ёрдам берди. Тушунмайдиганлар ҳам учради. Тўғриси, йўл давомида мени тиланчи-ю, майпараст деганлар ҳам бўлди. Биласизку, ҳаётда одамлар ҳар хил. Мен бу саёҳатга ўзимни иродамни синаш учун чиқдим.
Ногиронлик аравачасида ўзининг имкониятини синаш мақсадида йўлга чиққан Қаҳрамон Узоқов Тошкентга бориб, шаҳарни томоша қилишни ният қилган.
- Ҳозирги мақсадим пойтахтга бориб Тошкент Ситини томоша қилиш. Агар совуқ тушиб қолмаса, қолаверса аравачам панд бермаса водийга, сўнг Бухоро ва Хоразм томонларга ҳам саёҳатга чиқишга ҳаракат қиламан. Энг катта орзуим ногиронлик аравачасида бўлса-да Ҳажга бориш. Аравачангиз яхши бўлса қўрқмасдан йўлда кетаверасиз. Худо кўрсатмасину, йўлда аравачангиз бузилиб қолса бу иссиқ одамни анча қийнаб қўяди.
Қаҳрамон ака билан суҳбатимиз қисқа бўлди. Видеога олмоқчи эдим, кўнмади.
«Одамни хижолатга қўйманг, видеога олишингиз шартмас. Кўрганлар нотўғри хаёлга боради. Мен бу саёҳатга кимнидир раҳмини келтириш учун эмас, балки жаннатмакон юртимнинг гўзал гўшаларини кўриш учун чиқдим», — дейди Қаҳрамон ака.
Гарчи ногиронлик аравачасида бўлса-да саёҳатга чиққан Қаҳрамон Узоқовнинг иродасига қойил қолмай иложи йўқ. У кишини кўзлаган манзилига эсон-омон етиб олишига, Тошкентга келиб, ўзининг ҳақиқий қаҳрамонлигини кўрсатишига тилакдошмиз.
Фарҳод Норбўтаев
Изоҳ (0)