O‘zbekiston Prezidenti tashabbusi bilan o‘tkazilayotgan Markaziy Osiyo yoshlar forumi o‘z ishini Samarqand shahrida davom ettirmoqda. Bu haqda “Daryo”ga Yoshlar media markazi ma’lum qildi.
Qo‘shni davlatlardan kelgan mehmonlar hamda forumning o‘zbekistonlik ishtirokchilari Samarqand shahrida tantanali kutib olindi.
Avvaliga shaharning diqqatga savzovor joylarini tomosha qilgan mehmonlar forumning ochilish marosimida ishtirok etish uchun Samarqand viloyat hokimligi binosiga yig‘ildi.
Tadbir qardosh xalqlar urf-odatlari, tabiat manzaralari va me’moriy yodgorliklari lavhalaridan tayyorlangan videorolik bilan boshlandi. Ochilish marosimida so‘zga chiqqan O‘zbekiston Yoshlar ittifoqi Markaziy kengashi raisi Qahramon Quronboyev ushbu forum mintaqa yoshlarini birlashtiradigan, loyihalar, g‘oyalarni muhokama qiladigan, ularni amalga oshirish chora-tadbirlari ko‘riladigan hudud bo‘lishi kutilayotgani haqida gapirdi.
Shundan so‘ng so‘zga chiqqan Qozog‘istonning “Jas Otan” yoshlar qanoti va “Nur Otan” partiyasi raisi Daniyar Sundetbayev Markaziy Osiyo yoshlarini birlashtirish uchun xuddi shunday platforma yetishmayotgani va ushbu forum ayni muddao bo‘lganini ta’kidladi.
“Yoshlar forumlari Markaziy Osiyoning birlashib harakatlanishi hamda rivojlanishi uchun eng qulay vosita bo‘ladi deb hisoblayman. Bugungi kunda mamlakatlarimiz rivojlanishi uchun biz birlashib harakatlanishimiz kerak. Qo‘shnichilik munosabatlari har tomonlama yaxshi rivojlansagina mintaqamizda ham iqtisodiy, ham madaniy, ham ma’rifiy jihatdan rivojlanish bo‘ladi”, — dedi Daniyar Sundetbayev.
Ochilish marosimida Qirg‘iziston, Tojikiston va Turkmanistondan tashrif buyurgan vakillar ham so‘zga chiqdi va mintaqa yoshlarini birlashtiruvchi forum tashkil etilganidan, qo‘shni davlatlar yoshlari bir-birlari bilan bemalol muloqot qilishi va fikr almashishi uchun sharoit yaratilganidan mamnun ekanliklarini bildirdi.
Forum davom etmoqda.
Izoh (0)