Ўзбекистон Президенти ташаббуси билан ўтказилаётган Марказий Осиё ёшлар форуми ўз ишини Самарқанд шаҳрида давом эттирмоқда. Бу ҳақда «Дарё»га Ёшлар медиа маркази маълум қилди.
Қўшни давлатлардан келган меҳмонлар ҳамда форумнинг ўзбекистонлик иштирокчилари Самарқанд шаҳрида тантанали кутиб олинди.
Аввалига шаҳарнинг диққатга савзовор жойларини томоша қилган меҳмонлар форумнинг очилиш маросимида иштирок этиш учун Самарқанд вилоят ҳокимлиги биносига йиғилди.
Тадбир қардош халқлар урф-одатлари, табиат манзаралари ва меъморий ёдгорликлари лавҳаларидан тайёрланган видеоролик билан бошланди. Очилиш маросимида сўзга чиққан Ўзбекистон Ёшлар иттифоқи Марказий кенгаши раиси Қаҳрамон Қуронбоев ушбу форум минтақа ёшларини бирлаштирадиган, лойиҳалар, ғояларни муҳокама қиладиган, уларни амалга ошириш чора-тадбирлари кўриладиган ҳудуд бўлиши кутилаётгани ҳақида гапирди.
Шундан сўнг сўзга чиққан Қозоғистоннинг «Жас Отан» ёшлар қаноти ва «Нур Отан» партияси раиси Данияр Сундетбаев Марказий Осиё ёшларини бирлаштириш учун худди шундай платформа етишмаётгани ва ушбу форум айни муддао бўлганини таъкидлади.
«Ёшлар форумлари Марказий Осиёнинг бирлашиб ҳаракатланиши ҳамда ривожланиши учун энг қулай восита бўлади деб ҳисоблайман. Бугунги кунда мамлакатларимиз ривожланиши учун биз бирлашиб ҳаракатланишимиз керак. Қўшничилик муносабатлари ҳар томонлама яхши ривожлансагина минтақамизда ҳам иқтисодий, ҳам маданий, ҳам маърифий жиҳатдан ривожланиш бўлади», — деди Данияр Сундетбаев.
Очилиш маросимида Қирғизистон, Тожикистон ва Туркманистондан ташриф буюрган вакиллар ҳам сўзга чиқди ва минтақа ёшларини бирлаштирувчи форум ташкил этилганидан, қўшни давлатлар ёшлари бир-бирлари билан бемалол мулоқот қилиши ва фикр алмашиши учун шароит яратилганидан мамнун эканликларини билдирди.
Форум давом этмоқда.
Изоҳ (0)