Инновацион ривожланиш вазири Иброҳим Абдураҳмонов Жаҳон банкининг Европа ва Марказий Осиёдаги молия, рақобатбардошлик ва инновация масалалари бўйича Глобал амалиёт сектори раҳбари Мариализа Мотта билан учрашди. Бу ҳақда «Дарё»га вазирлик матбуот хизмати маълум қилди.
Учрашувда, шунингдек, Жаҳон банкининг Марказий Осиёдаги ҳудудий идораси бош иқтисодчиси Стефка Славова ва Жаҳон банкининг Ўзбекистондаги ваколатхонаси ходими Сердар Жепаров иштирок этди.
Таъкидлаш жоизки, Иброҳим Абдураҳмонов ва Мариализа Мотта жорий йил апрель ойида Братиславада учрашган, ўша пайтлари эндигина тузилган Инновация вазирлигининг вазифалари, мақсадлари ҳақида фикр алмашишган эди. Шу боис ҳам Мотта хоним Тошкентга ташрифи доирасида уюштирилган учрашувларни Инновация вазирлигидан бошлаган бўлса, ажабмас.
Учрашув давомида вазир Инновацион ривожланиш вазирлиги томонидан амалга оширилган ишлар ҳақида гапираркан, вазирлик томонидан ишлаб чиқилган ва тез кунларда жамоатчиликка тақдим этилиши кутилаётган Ўзбекистон инновацион ривожланиш стратегияси ҳақида тўхталди.
Мариализа Мотта Инновация вазирлиги томонидан қисқа фурсатлар ичида амалга оширилган ва оширилаётган ишларга ижобий баҳо бериб, Жаҳон Банки республиканинг инновацион фаолиятини ривожлантиришга қисқа ёки узоқ муддатли заёмлар беришга тайёр эканини айтди.
Жаҳон банки томонидан бериладиган заёмларнинг шартлари ва ҳажми кейинги музокараларгача томонлар ўртасида муҳокама қилиниши ҳақида келишиб олинди.
Изоҳ (0)