Toshkent shahrida ta’mirlash ishlari olib borilishi munosabati qator ko‘chalarda avtotransport harakatlanishi to‘xtatiladi. Bu haqda IIBB axborot-multimedia markazi ma’lum qildi.
Jumladan, 24-iyundan boshlab to sovuq suv ta’minoti quvurlari almashtirilguncha (taxminan bir oy davomida) Farg‘ona yo‘li ko‘chasining Nukus ko‘chasi yo‘nalishidan to Talimarjon ko‘chasigacha bo‘lgan qismi yopildi. Qarama-qarshi tomonga harakatlanish ochiq qoldirilgan, shuningdek, Mehrjon ko‘chasi bo‘ylab aylanib o‘tish mumkin.
Metropoliten qurilishi munosabati 23-iyundan boshlab qurilish ishlari tugaguncha Elbek ko‘chasining Aviasozlar ko‘chasidan Alimkent ko‘chasigacha bo‘lgan qismi ham berkitildi.
Bunyodkor ko‘chasining Kichik halqa yo‘li bilan kesishmasidagi yo‘lo‘tkazgich kapital ta’mirlanishi munosabati bilan 25-iyundan boshlab Bunyodkor ko‘chasining Muqimiy ko‘chasidan Qatortol ko‘chasi 2-o‘tish yo‘ligacha bo‘lgan qismi yopildi. Mazkur o‘tish yo‘li, shuningdek, Do‘mbirobod 4-o‘tish yo‘li, Chilonzor, Qatortol ko‘chalari va Kichik halqa avtoyo‘li orqali aylanib o‘tish uchun imkoniyat yaratilgan.
Izoh (0)