O‘zbekistonda qurilishning keskin o‘sishi tufayli Qozog‘istonda uy-joylar qimmatlashishi mumkin

O‘zbekistonda qurilish materiallariga talabning sezilarli ravishda oshishi tufayli, Qozog‘istonda uy-joy narxi ko‘tariladi. Bu haqda Qozog‘istonning BI Group qurilish kompaniyasi direktorlar kengashi raisi Aydin Rahimbayev Facebook’dagi sahifasida ma’lum qildi, deb yozadi “Kommersant.uz”.

Uning so‘zlariga ko‘ra, sement so‘nggi olti oy ichida ikki marta qimmatlashgan.

“Bu faqat boshlanishi deb o‘ylayman, chunki qo‘shnilarimizni barcha keng ko‘lamli yangi loyihalar hali oldinda kutmoqda, va iqtisodiyot ham endi uyg‘onmoqda. Ilgari biz ulardan arzon sement sotib olardik, endi esa ularning o‘ziga sement yetmayapti. Bizga ham o‘zimizniki yetmayapti. Sement shunday tovarki, uni uzoqdan olib kelib bo‘lmaydi, yangi zavod esa uch yildan beri qurilyapti”, — deb yozdi Aydin Rahimbayev.

Uning ta’kidlashicha, sement narxi o‘n yildan buyon ko‘tarilmagan edi, qurilish kompaniyalari esa loyihalarga uning odatiy qiymatini kiritgan. Ammo so‘nggi olti oy ichida sement narxi ikki marta oshishga ulgurgan.