O‘zbekiston chegara qo‘shinlari may oyida davlat chegarasini buzib o‘tgan va qiymati 372 million so‘mni tashkil etuvchi tovarlarni noqonuniy olib o‘tishga uringan 48 nafar qonunbuzarni qo‘lga oldi. Bu haqda Davlat xavfsizligi xizmati chegara qo‘shinlari vakiliga asoslanib, “Gazeta.uz” xabar berdi.
Qozog‘iston bilan chegarada 25 nafar, Qirg‘iziston bilan chegarada — 16 nafar, Tojikiston — 4 nafar va Afg‘oniston bilan chegarada 3 nafar qonunbuzar qo‘lga olingan. Turkmaniston bilan chegarada esa may oyida hech qanday qonunbuzarlik qayd etilmagan.
May oyida qo‘lga olingan barcha tovarlar Qirg‘iziston va Tojikiston chegarasiga to‘g‘ri keladi. Ushbu tovarlarni asosan, dori vositalari, tamaki mahsulotlari, elektr lampalar, shuningdek, yirik shoxli chorva mollari tashkil etgan.
3-may kuni Farg‘ona tumanining chegara yaqinidagi Gulpiyon aholi punktida 197 million so‘mlik dori vositalarini olib o‘tishga uringanlar ushlangan.
9-may kuni chegarachilar Toshkent viloyatidagi O‘ratepa punkti orqali 50 million so‘mlik tamaki mahsulotlarining noqonuniy olib kirilishini oldini olgan.
24-may kuni Namangan viloyatining Mamay Yangiqo‘rg‘on chegara punktida Qirg‘izistondan noqonuniy ravishda yirik shoxli mollarni olib kirishning oldi olingan.
Chegara buzuvchilarga nisbatan O‘zbekiston qonunchiligi doirasida chora ko‘rildi, ushlangan tovar-moddiy boyliklar davlat hisobiga o‘tkazildi.
Izoh (0)